Sementando poesías no Camiño 20.25

Mes de maio

que termina,

mes das flores

que arrecenden,

mes para esquecer, 

mes de sementar

poesías no Camiño.

Do mesmo xeito có ano pasado, @s peregrin@s que repousan no noso veciño Albergue xa poden encher as súas horas de descanso escoitando poemas en lingua galega. Cales? Os presentados á edición deste ano do 'Fai viral a poesía!!!'.
Para iso deixámoslles un cartaz no vestíbulo con acceso aos poemas de Alma, Ana, Yago, Cayetana e Carmen a través de cadanseu código QR.
Ademais, facilitámoslles o acceso a esta bitácora para -tamén mediante o seu código QR- poderen consultar todos os recursos que día a día achegamos.

De Málaga a...

Xa queda moi pouco para xuño –case case nada- e boa parte do alumnado de 4º de E.S.O., acompañado polos profesores David e Miguel, decidiu achegarse a Málaga para ver se chegaba antes.
Como dicía aquela canción “y se fue mirando al sur buscando el verano...”

Nas imaxes podemos velos no bus que os levou do aeroporto de Málaga a Torremolinos, a súa base de operacións, e nas súas visitas ao estadio de La Rosaleda e a Selwo (según a súa web "o parque de animais máis grande de Andalucía").
Tamén gozaron na piscina e de numerosas paradas para a hidratación –utilizando un símil deportivo- que, abofé, deron pé a cantidade de anécdotas que nos contarán á súa volta.

Axudas da Xunta para a adquisición de libros de texto e material escolar

A noticia na web do sindicato ANPE indica que "Os centros docentes sostidos con fondos públicos, a través da aplicación informática Fondolibros, tramitarán as solicitudes de participación no fondo solidario de libros de texto e das axudas para adquirir libros de texto e material escolar (ED330B) e realizar os demais actos de xestión previstos nesta orde."
Tedes todos os detalles da convocatoria NESTA LIGAZÓN.

Coida o galego coma unha flor

Falabamos hai uns días que o galego sempre encaixa.
Aló viamos unha palabras formando un crebacabezas pero, se cadra, alguén podía pensar: "E estas  palabras... que significan?"
Pois para resolver esa dúbida o alumnado de Primaria elaborou tamén esta fermosa flor, que nos serve ademais para lembrar que a nosa lingua -como todas as cousas e persoas que aprezamos- require coidados. Por iso o seu lema é "Coida o galego como unha flor".
Do mesmo xeito que O Pequeno Príncipe de Saint-Exupéry sabía que "a miña rosa é importante polo tempo que adiquei a coidala", nós temos que pensar que para conservar a nosa lingua -máis fermosa cá máis fermosa das flores- debemos tamén coidala.
E xa que unha parte moi importante para coidar algo é coñecelo ben, por ese motivo a flor proporciónanos o significado daquelas palabras que compuñan o crebacabezas.

A peor noticia de sempre

Como sabedes, querid@s trasn@s, a mellor entre as mellores acaba de deixarnos.
Poderíamos escribir milleiros de páxinas e aínda quedarían cousas boas para ser ditas sobre ela, así que imos adxuntar -sen máis- a mensaxe que transmitiu o Equipo Directivo do Centro á comunidade educativa:

"Con profunda tristeza informamos do falecemento da nosa orientadora Mª de la Paz Parajó Gómez, quen foi un pilar fundamental na nosa comunidade educativa. O seu compromiso, cariño e dedicación ao acompañamento dos nosos alumnos e as súas familias foi todo un exemplo de vocación, cariño e calidade humana. Como comunidade educativa unímonos na dor e na despedida dunha gran compañeira que ademais foi un faro de luz e esperanza para todas e todos nós."

A nosa non é a homenaxe que ela merece -nin de lonxe!-, nin a calidade do vídeo (limitada pola bitácora) é a mellor... pero quixemos rescatar dos arquivos do trasno estes cortes para poder vela rir cantas veces queiramos, como seguro que a ela lle gustaría que a lembrásemos.
Un bico forte, amiga: a túa bondade, xenerosidade e compromiso ficarán para sempre nos nosos corazóns.

Entrega de premios da XXVII edición do Certame Intercentros

Co gallo do Día das Letras Galegas, as comunidades escolares dos colexios Xesús Ferro Couselo e Baño-Xanza de Valga e dos CPI de Pontecesures e Progreso de Catoira déronse cita no Auditorio Municipal de Valga para entregar os premios da XXVII edición do Certame Intercentros.

Este ano -despois do éxito colleitado pola ANPA do noso centro na organización da cerimonia da anterior edición- a entrega de premios foi organizada pola ANPA do colexio de Cordeiro.

O propósito do acto, como dicimos, foi entregar os premios do concurso literario no que participa cada ano o alumnado de 3º, 4º, 5º e 6º cursos de Educación Primaria dos catro centros do Baixo Ulla e contou con actuacións musicais a cargo das pandeireteiras de Casal de Eirigo e do gaiteiro Pablo Dopazo.

@s alumn@s do noso centro que colleitaron un premio foron:
- Lois Janeiro Castroagudín, gañador do 1º premio na categoría de poesía entre o alumnado de 5º de Primaria co seu poema 'O son das mulleres'.
- Daniela Gándara Jamardo, 2º premio en narrativa de 4º, co seu relato 'As pantasmas Fernando e Pipo'.
- Daniela Campos Quintáns, 3º premio de narrativa do alumnado de 6º, pola súa obra 'O xogo con clave'.
- Abigail Lorenzo Gómez, 4º premio en narrativa de 3º, por 'Na búsqueda do tesouro dourado'.

Se queres coñecer en detalle o nome de todas as persoas galardoadas podes consultar ESTA NOTICIA da web valga.gal.
Para ver máis fotos da cerimonia, aconsellámoste consultares a seguinte publicación no facebook do Concello de Valga facendo clic sobre a seguinte imaxe.

A festa das Letras

Por fin recuperada a nosa gorxa de tanto canto do sábado, desde as 12:30 celebramos -no día de hoxe- o festival polo Día das Letras Galegas.
Os labores de presentación correron a cargo do alumnado da ESO.
Nunha primeira parte da festa, o alumnado de Primaria interpretou cancións do Cancioneiro Popular de Galicia.

A continuación Lois Janeiro Castroagudín, de 5º, leu o seu fermoso poema 'O son das mulleres', que foi o vencedor no Certame Intercentros deste ano na categoría de poesía.

Pero as rapazas e os rapaces da ESO non ían só presentar, senón que tamén tiveron o seu momento para ler e cantar cantigas.

O alumnado de 5º e 6º de EP puxo a nota deportiva cunha exhibición de acrosport.

Cando xa empezabamos a terminar, fíxose entrega a Enma do seu diploma como gañadora do concurso de Marcapáxinas.
E o concurso 'Fai Viral a Poesía' -non sen tempo- fixo público o nome dos seus gañadores: o Premio do Alumnado, o premio grande, foi para Cayetana e Carmen, que nos deleitaron co poema 'Falade galego' de Eduardo Pondal, con voz e música propias; dos premios do Xurado, o 1º Premio gañouno Yago, o 2º Alma e o 3º Ana.

Coas actuacións musicais do alumnado da ESO -que levaron a toda a rapazada a una conga multitudinaria, contaxiada pola música- púxose punto final ao evento.

O Galego Sempre Encaixa

Que prefires? Xogar ás palabras encadeadas ou resolver un crebacabezas?
O alumnado de Primaria realizou na última semana (a que dá paso ao Día das Letras Galegas, celebrado este pasado sábado) este crebacabezas, cada grupo a súa liña, para lembrarnos que a nosa lingua -ademais de fermosa, cantareira e con historia- é ben acaída para ser empregada en calquera ocasión.
E iso fano xogando ás palabras encadeadas: a ver se dás adiviñado cales son...
Ben visto... por que conformarnos con recoñecer as palabras?
Por que non escribir algunha historia na que esas palabras, aparecendo na historia nesa orde, teñan nela a súa trascendencia?

Parece que por fin sabemos cales son as palabras que quixemos encaixar.

Pero... sabemos que significan?
Para iso, coida o galego como unha flor!

Premio Nortear de relato curto, 11ª edición

Está aínda aberto o prazo para participar na 11ª edición do premio de relato curto Nortear que recoñece obras en galego ou portugués.
Este premio está impulsado pola Agrupación Europea de Cooperación Territorial da Eurorrexión Galicia-Norte de Portugal e a Consellería de Cultura, Lingua e Xuventude, en colaboración coa Comisión de Coordinación e Desenvolvemento Rexional do Norte I.P.
A contía do premio non é pouca cousa, nada menos que 3.000 euros.
Poden presentar as súas obras persoas de entre 16 e 36 anos de Galicia ou do norte de Portugal, que teñan unha escrita orixinal e inédita de 5.000 a 8.000 palabras de extensión.
Ademais de recibir a dotación económica, a persoa gañadora tamén verá o seu traballo publicado fisicamente nas linguas galega e portuguesa.
O prazo para presentar orixinais a concurso permanecerá aberto ata o 30 de xuño A TRAVÉS DA WEB DA PLATAFORMA NORTEAR.
Se queres coñecer máis pormenores da convocatoria, podes consultar ESTA NOTA do Portal da Lingua Galega ou estoutra da WEB DA XUNTA.

Sementando poesías no camiño: o cartel

Como podes ver sobre estas liñas xa temos preparado o cartel de Sementando poesías no Camiño para este ano.
En galego, español, portugués, francés e inglés convidamos a@s peregrin@s a desfrutar dos traballos d@s nos@s poetas nos seus últimos pasos polo Camiño Portugués, faltaría máis!
Tamén engadimos a ligazón á nosa bitácora por se @s peregrin@s están interesad@s en coñecer máis polo miúdo as actividades en prol da lingua e da cultura galegas que se desenvolven no noso Centro.
E, á vista está, engadimos a contorna do noso Centro (en concreto o Mirador do Pino Manso) ao tema do noso cartel. 
Moi pronto estará no Albergue para difundir a nosa mensaxe poética...

O mellor amigo do libro, o marcapáxinas

Como sabemos, mañá sábado é o Día das Letras Galegas, neste ano dedicado ás cantareiras e á poesía popular oral.
Xa demos conta en moitas entradas desta bitácora de recursos e materiais a este respeito, e máis virán.
Lembrarás que co gallo do Día das Artes Galegas, celebrado o pasado 1 de abril na honra de Isaac Díaz Pardo, convocamos un concurso de marcapáxinas.
Hoxe temos por fin eses marcapáxinas nas nosas mans e que mellor día que hoxe para repartilos!
Agora que podemos usalos, cada vez que retomemos as nosas lecturas lembraremos a figura do polímata compostelán e deleitarémonos coa composición plástica de Enma Gerpe Fernández, que é a alumna autora da imaxe que figura no seu anverso despois de gañar o concurso.
Parabéns, Enma!

Ollo, que iso non é todo!!! O próximo xoves teremos no centro un festival para celebrar as nosas Letras. Nese festival haberá un oco para que entreguemos os diplomas que temos pendentes. 

Pero se non podes esperar, se o corpo che pide música, mañá tés a oportunidade de satisfacer esa fame, como podes ver na imaxe. Hai que achegarse a Santiago, iso si... peregrin@s dos cantos!!!!

Galiña morriña, agarimo ruliña

Poucos días antes de celebrar este sábado o Día das Letras, o alumnado de terceiro sorprendeunos cun fermoso conxunto de palabras non menos fermosas.
Cóxegas, enxebre, colo, berce... e nomes como Lois ou Uxía adornan as portas da súa aula.
Xa que este ano celebramos a poesía popular oral, a ver quen argalla o canto máis ocorrente con todas estas palabras...

Ecos que aínda resoan...

... do Día do Libro.
Por unha parte, co Día do Libro volveron os padriños lectores.
No patio de Infantil, e aproveitando o marabilloso sol de abril, os padriños de Primaria compartiron lecturas coas súas compañeiras e cos seus compañeiros máis pequen@s.

Polo seu lado, o alumnado do Club de Lectura de 5º descubriu o feitizo do Quixote.
Tanto ler, tanto ler... esperemos que non lles pase o mesmo que a Don Alonso Quijano e fique todo nun susto...