Ler conta moito: Da árbore ao libro (Cuarto de Inverno)

Na mañá de hoxe o alumnado de 3º de Primaria, acompañado por dúas profesoras, achegouse á Biblioteca Municipal para participar na actividade de contacontos manipulativo titulada 'Da árbore ao libro', que chega ata nós a través de Andrea Jamardo Seijo, antiga alumna do noso Centro.
Como se fai un libro? Que agocha dentro das súas páxinas, ademais dunha historia? Cantas persoas fan falla para facelo? Que clases de libros hai?
Cuarto de Inverno (a editorial que dirixiu a sesión) é parte do nacemento dos libros como un obxecto, pero a  historia do libro é moito máis antiga.
Na dinámica desenvolvida o alumnado puido coñecer os distintos materiais que se pode utilizar para elaborar un libro, soubo dos libros máis raros da historia e acabou a sesión elaborando o seu propio (mini) libro.

Ler conta moito: A viaxe do libro

Na mañá de hoxe o alumnado de 6º acompañado polo seu titor achegouse á Biblioteca Municipal para participar na actividdade titulada 'A viaxe do libro', que chega ata nós a través da antiga alumna do centro Andrea Jamardo Seijo.
'A viaxe do libro' é un obradoiro impartido polas persoas que forman parte da Editorial Cuarto de Inverno onde a rapazada pode coñecer de xeito sinxelo e ameno a viaxe dunha obra literaria desde que é apenas unha idea vaga na cabeza dunha persoa ata que nos dispoñemos a ler a obra editada.
Que é unha editora? Cantas persoas traballan para publicar un libro? Todas estas cuestións e moitas máis tiveron resposta no desenvolemento da actividade, da que o alumnado desfrutou dabondo.

Ler conta moito: Contacontos con Manuel Fontemoura

Na mañá de hoxe o alumnado de 4º e 5º de Primaria achegouse á Biblioteca Municipal, desafiando as chuvieiras que en ocasións collían forza, para asistir a unha actividade de contacontos, que entroutras virtudes contribúe a fomentar a lectura entre @s máis cativ@s.

Alí puideron realizar unha actividade de interpretación e un taller arredor do libro "A nena do vestido de flores", escrito polo propio Manuel Fontemoura, co obxectivo de concienciar a rapazada sobre as discapacidades e achegarlles os Trastornos do Espectro Autista.
A rapazada desfrutou da actividade, e é seguro que tamén lle serviu para reflexionar sobre a temática das historias que lles contaron. 

Galicreques 2024

Desde o pasado sábado día 12 e até o próximo domingo 20 de outubro celébrase en Santiago de Compostela o Festival Internacional de Títeres Galicreques.
Como podemos ver no seu cartaz, a deste ano é a súa vixésimo novena edición, e podes consultar a programación, todo o relativo ás entradas, ás representacións, aos premios e demais na web do festival NESTA LIGAZÓN.
Toda a programación do festival é moi recomendable, pero queremos salientar na imaxe inferior a programación específica para os centros educativos, que se desenvolve durante os días lectivos desta semana en diversos puntos da cidade:

Premios da Cultura Galega 2024

Na mañá de hoxe reuniuse o Xurado que concede os Premios da Cultura Galega, como nos indica ESTA NOTA DE PRENSA da Consellería.
Estes premios distinguiron a Manuel Lourenzo (na categoría de Letras), Xose María Pérez Barro (Artes Visuais), Marta Pazos (Artes Escénicas), Joaquín Martínez (Música), Ficción Producións (Audiovisual), Julia Díaz (Lingua), Xosé Manuel González (Patrimonio Cultural) e Real Club Celta de Vigo (Proxección Exterior). 
Se queres coñecer máis detalles sobre este asunto podes consultalos, por exemplo, NESTA NOTICIA  de El Progreso.

Presentación da campaña "Saca a lingua que levas dentro"

No día de onte o conselleiro de Cultura, Lingua e Xuventude, José López Campos, protagonizou a presentación da nova imaxe da campaña 'Saca a lingua que levas dentro', coa que se procura “pór en valor o privilexio que supón contar cun idioma propio, que debemos ver como un gran tesouro do que estar orgullosos”. En palabras do conselleiro, “non hai mellor xeito de defendelo e de preservalo que falándoo”.
Se queres coñecer máis detalles sobre as actividades propostas para gañar nov@s falantes da nosa lingua podes consultar ESTA NOTA DE PRENSA da Consellería ou seguir ESTA LIGAZÓN do Portal da Lingua Galega.

(Dous días despois)

A presentación á que nos referimos chegou case ao tempo que a Enquisa estrutural a fogares sobre o coñecemento e uso do galego, realizada polo Instituto Galego de Estatística, que reflicte datos ben preocupantes sobre o presente e o futuro da nosa lingua.
Se queres ter acceso aos resultados da enquisa podes acceder a eles NESTA LIGAZÓN.
NESTA PUBLICACIÓN de Nós Diario realizan unha demorada análise dos resultados anteriores. 

A Asociación Morreu o Demo, recoñecida pola UNESCO

Este é o ano de Levantar o pano, como indica o nome do noso Proxecto de Biblioteca, e como nos contan nesta noticia de culturagalega, a Asociación Morreu o Demo recollerá un dos Certificados do Patrimonio UNIMA deste ano.

A Unión Internacional da Marioneta (UNIMA) é un organismo asociado á UNESCO e concede 37 recoñecementos a proxectos de todo o mundo.
Un deles foi concedido á Asociación Cultural Morreu o Demo, que desde hai máis de dez anos traballa para recuperar o monicreque tradicional galego e a figura de Barriga Verde (de aí sacaron precisamente o nome: "morreu o demo, acabouse a peseta").

A Revista Galega de Teatro dá conta NESTA NOTICIA do recoñecemento da UNIMA.

Se queres coñecer máis polo miúdo o traballo da Asociación podes visitar A SÚA WEB.

Se che interesa tanto que aínda queres saber máis, clicando na imaxe inferior podes ver o documental "Morreu o demo, acabouse a peseta" a través da web da CRTVG.