Músicas lusófonas para a corentena

O alumnado de 1º B da ESO, na materia de Lingua Galega e literatura estiveron traballando a lusofonía. Para iso, decidiron buscar cantantes ou grupos musicais lusófonos e crearon unha lista de reprodución en Spotify: Músicas lusófonas para a corentena.
Esperamos que sexan do voso agrado e que as desfrutedes! 
 Clica no seguinte enlace e  poderás acceder á recopilación en Spotify.
Músicas da lusofonía para a corentena por Patricia Penelas

COVID-19 "FABRICANDO LUZ"

O profesorado do noso centro quere darlle un chisco de luz a este confinamento.

Por iso, para que collades todxs as familias e alumnado un pouco de ánimo, botándovos unhas risas, despregamos todxs os medios e as nosas mellores galas, para versionar esta fantástica canción, do grupo musical " A banda da loba", do que forma parte a nosa compañeira Andrea, a mestra de música.

Agardamos que o desfrutedes tanto coma nós cando o fixemos. Grazas a Berena pola montaxe.

8 de marzo - día da MULLER

Alumnado de 1º e 4º da ESO coa profesora Luísa Paz Patiño elaborou este mural " A muller na historia" na que aparecen mulleres das familias da rapazada. 
Acompaña ás fotografías das protagonistas o texto da canción MATRIARCAS de Guadi Galego. 

CONTACONTOS DE KALANDRAKA- 9 de marzo

O alumnado de Educación Infantil e de 1º e 2º de Educación Primaria puido gozar o pasado luns 9 de marzo dunha sesión de contacontos de Kalandraka por parte de Sara Lebedinsky e o músico Alex Fente.
 Nenas e nenos conseguiron vivir, por un momento, noutros mundos e na pel doutras personaxes.

Algúns dos contos que contaron e cantaron.

Aquí podedes desfrutar dun intre da súa fantástica actuación.

DÍA DE ROSALÍA -- 24 DE FEBREIRO

O alumnado de 1º e 6º realizaron este mural na clase de Plástica, para homenaxear á nosa escritora máis internacional.

A nosa Rosalía recitada e cantada por tantos artistas con estilos tan diferentes. Aquí vos deixo unha mostra:

ASTAROT "ADIÓS RÍOS ADIÓS FONTES"

AMANCIO PRADA  creo que é a persoa que máis cantou a Rosalía, polo mundo enteiro, a poesía non entende de fronteiras, vai directa ao corazón.

 Amancio ten milleiros de videos en youtube, todos moi emotivos, pero este descubrino este Nadal, cando unha amiga entrañable, me felicitou o Aninovo con el, quero compartilo con todxs porque pon os pelos crespos e derrete o corazón. Espero que vos emocione tanto coma a min!

Grazas Rosiña!

 LUZ CASAL E CARLOS NÚÑEZ " Negra sombra"

ENTROIDO 2020

O noso Entroido xira en torno aos HÁBITOS SAUDABLES:

o coidado persoal e a saúde, o coidado da natureza, a reciclaxe...

Medidas que debemos adoptar no noso quefacer cotiá para coidar ao noso planeta e a nós.

INFANTIL cos deportes.

1º e 2º " MONSTROS RECICLADOS"

 3º e 4º  " OS SUPERHEROES DA RECICLAXE"

5º e 6º " OS DORMICHÓNS"

A ESO tamén actuou: FROITAS, LEGUMES, DEPORTES,...

Algúns videos das actuacións

Recuperemos tradicións do Entroido

AS CARTAS DO BURRO

Estas cartas eran moi habituais en Galicia ata mediados dos anos 50, pero foron perdéndose co tempo.

Antigamente mandábanse cartas de forma anónima por estas datas, moitas veces eran cartas de amor pero outras facíanse en tono satírico e crítico, case sempre eran escritas en verso con rima, aínda que para que rimaran houbese que empregar castelanismos. Nos comezos de feito, eran escritas en castelán con influencias do galego de cada zona.

As cartas do burro levan sempre versos rimados e uns burros debuxados, que nalgún caso leva un obxecto representativo do escrito.

Naquelas datas había incluso expertos na materia, que eran os encargados de escribir esta peculiar correspondencia, porque tiñan habilidades especiais para facer rimas e para debuxar.

Denominábanse “cartas do burro” porque o destinatario non coñecía o remitente, ou sexa, o que lla enviaba.

Nas escolas, agochábaselle a carta do burro, na carteira ou no libro, do rapaz ou rapariga que che gustaba, sen que se enterase de quen o fixera. Isto facíase a semana antes do Entroido. Quen recibía un burro, facía outro, aínda que non sempre se atinaba co destinatario, o importante e divertido era facer correr os burros duns para outros, sen ningún ánimo de ofender.

* Este foi o folleto informativo sobre a carta do burro, que se publicou por todo o centro.

Aquí deixamos uns burriños que apareceron polo noso centro, se os vedes por aí, coidádeos e dádelles cariño, para que no vindeiro Entroido volvan por aquí e por todos os centros escolares de Galicia. Entre todxs temos que recuperar as nosas tradicións.

QUIXEMOS COMPARTIR ESTA DIVERTIDA TRADICIÓN MÁIS ALÁ DO NOSO CENTRO.

ENVIAMOS ESTES BURRIÑOS TAN FALANGUEIROS AO CPI PROGRESO DE CATOIRA, AGARDAMOS QUE OS RECIBAN CON ILUSIÓN. 

 

      

30 de xaneiro "DÍA DA PAZ"

Para entender a que nos referimos cando estamos dicindo PAZ o grupo de teatro, formado por alumnado de Educación Secundaria e dirixidos pola profesora Luísa Mª Paz, representounos unha pequena peza a todo o centro. En catro pases da mesma obra, e con toques de humor fantásticos, conseguiron que tanto o resto do alumnado como o profesorado profundizaran no extenso do termo PAZ, facéndonos reflexionar sobre as accións que no día a día poden mellorar a convivencia.

Nesta data entregáronse os premios aos microrrelatos sobre o silencio ao alumnado da ESO. Podedes ver todo no blog da biblioteca.

 Ao longo dunha semana, o alumnado e profesorado estivo experimentando co silencio. A actividade consistía na reducción máxima de ruído que se escoita nos diferentes corredores do centro, incidindo nas entradas e saídas do horario lectivo, así como nos cambios de especialidade e recreos.

Ademais puideronse visualizar, nas titorías, diferentes documentais informativos que resaltaban a importancia de reducir a contaminación acústica, o perxudicial que podía ser para a nosa saúde e invitándonos a experimentar a relaxación e concentración a través de visualizacións.

E para que a actividade non perdera interés, creouse un pequeno xogo onde os titores valoraban, e puntuaban, ao final da xornada o nivel de ruído/silencio da súa clase para establecer ao remate da semana quen foran os gañadores.