... e as gañadoras son...

Mira ben, mira ben...
Recoñeces a túa portada?
Parabéns, porque nese caso a túa é unha das gañadoras na quinta edición do noso concurso Está de medo!!!
Estes son os traballos premiados e o nome das persoas que os presentastes... 

 

O xurado quere subliñar que moitos traballos de grande valor artístico non optaron ao premio polo incumprimento das bases do concurso, o cal non quere decir que as propostas gañadoras posúan menos valor artístico ou calidade.
En poucos días procederemos á entrega dos premios.
Ata daquela, parabéns ás gañadoras!!! 

In Castanea Veritas

Contaba Alfred Hitchcock que os antigos romanos abrían o corpo dos animais e remexían nos seus órganos para adiviñar o futuro.
Tamén que a auténtica natureza das persoas saía a relucir cando bebían viño, por iso aquilo de “In vino veritas”.
Nós, abstemios por natureza, confraternizamos e axexamos o porvir arredor das brasas e unha manchea de castañas, e aproveitamos a mañá para xogar un pouco, que nunca vén mal.
Este ano foi, en concreto, o pasado xoves, despois dun día de chuvia que fixo adiar a celebración e tampouco foi para tanto.

E, por fin, despois de todo o traballo que se lles dedicou, tivemos listas as exposicións de cabazas nos corredores.

O corpo d@s nen@s... é que son de plastilina!!!

Nesta última semana de outubro o alumnado de 2º de E.P. estivo coñecendo máis polo miúdo o corpo humano na materia de Ciencias.
Para iso realizaron varias actividades: exploraron o corpo humano mediante as TIC, déronlle forma aos órganos de forma manipulativa con plastilina e recolleron a información de maneira escrita.
Ademais os rapaces e as rapazas compartiron cos compañeiros e compañeiras materiais sobre o corpo humano como libros e un puzzle a tamaño case real! 

Tes gañas de leria???

O Club de Debate Alingua abriu o período de inscrición para a súa edición 2026/2027.
Trátase dunha iniciativa promovida pola Asociación de Entidades pola Lingua Galega (Alingua) que procura fomentar o uso oral da lingua galega entre a mocidade e que mantén a súa aposta pola oratoria, o pensamento crítico e o traballo en equipo.
O prazo de inscrición permanecerá aberto até o próximo 20 de novembro e está dirixido ao alumnado de 3º e 4º de ESO e 1º de bacharelato, así coma aos cursos equivalentes dos ciclos formativos.
Os equipos deberán estar formados por entre catro e dez alumn@s e contar cun/ha docente encargad@ da súa preparación, asesoramento y representación.
Se queres completar a información podes consultar AQUÍ INFORMACIÓN SOBRE O CLUB ou, TAMÉN AQUÍ, A WEB DO CLUB.
Se o prefires, podes CONSULTAR AQUÍ O REGULAMENTO DO CLUB.
Se desexas inscribirte xa, ENCHE AQUÍ O FORMULARIO DE PARTICIPACIÓN.

Galego para principiantes

Queres aprender galego e coñecer mellor a nosa cultura?
Anímate a dar os teus primeiros pasos na lingua galega!
O Curso de Introdución á Lingua e á Cultura Galegas é unha oportunidade para achegarte ao noso idioma desde cero, gañar confianza á hora de utilizalo e descubrir a riqueza cultural de Galicia.
Está dirixido principalmente a persoas que non falan galego e queiran iniciarse nel ou mellorar as súas competencias lingüísticas, así como a todas aquelas persoas interesadas en coñecer mellor a cultura do noso país.

Que aprenderás?
Ao longo das cinco unidades didácticas, traballarás contidos prácticos e descubrirás diferentes aspectos da nosa lingua e cultura:
+ Fonética: coñecerás os sons do galego e mellorarás a túa pronuncia.
+ Gramática: aprenderás estruturas básicas para comunicarte en situacións cotiás.
+ Léxico útil: adquirirás vocabulario práctico para o día a día.
+ Cultura galega: achegaraste á historia da nosa lingua e á riqueza cultural de Galicia.

Se queres máis información do curso podes:
+ escribir a emprego@pontecesures.org
+ chamar aos teléfonos 986 564 403 ou 986 557 125.

A duración do curso é de 20 horas presenciais, está destinado a persoas maiores de 16 anos e é totalmente gratuíto.
Non  importa se nunca estudaches galego: este curso está pensado para que poidas comezar desde o principio e avanzar ao teu ritmo.
Atrévete a descubrir a lingua galega, a conectar coa nosa cultura e a sentirte máis preto de Galicia!

Estes contos e cabazas... están de medo!!!

Concluído o prazo para expor os traballos, as portadas de relatos, contos e novelas de terror presentadas á quinta edición do noso concurso 'Está de medo!!!' enchen xa os corredores do Centro.
Aquí traémosche un testemuño dos traballos que entran en competición, xa sabes que sempre é preferible contemplar os orixinais.
Pronto publicaremos a decisión do xurado, pero ti... tes algunha preferida??? 

E non só contos; os corredores do centro tamén se poboaron de cabazas do máis artístico (alén das que xa vos falamos a semana pasada), quer nos corredores de Infantil, Primaria ou Secundaria...

Isto é mergullarse de cheo no Samaín e o demais son... outra cousa.
Por certo; mañá celébrase no semisoto da Casa do Concello unha actividade de contacontos e obradoiro con cabazas de papel. Toda a información que temos vai na imaxe que segue (bule se queres anotarte, quen non hai prazas infinitas):