Graduad@s e demais familia

 

Antes da festa que anuncia a imaxe superior e da que xa vos falamos onte, no noso Centro houbo tempo para un pouco de todo.

O alumnado de 4º de E.S.O. protagonizou o seu acto de graduación na Biblioteca, tras o que tiveron ocasión de retratarse para a posteridade e de nutrirse para o inmediato.

A renglón seguido fíxose unha pequena homenaxe a Paz -indudablemente non a que merece- con dous discursos, un recordo poético ben sentido e dúas cancións.

E para pechar a xornada o grupo A Banda do Verán actuou ante un auditorio entregado.
O Trasno deséxavos bo verán a tod@s e, como vos diciamos tamén onte, non esquezades poñer crema.
E, xa postos a pedir, que o vindeiro ano sexa máis venturoso para tod@s, que o que pasou... déixao ir!!!
Porque non, é unha mágoa pero non, na vida Ctrl+Z non funciona.

Chega o verán, prepara a crema!!!

Chega o verán, si, e nada mellor ca unha escapadiña á praia da Lanzada, no Grove, para dalo por comezado.
Nas fotos podemos ver a@s intrépid@s surfeir@s preparad@s para cabalgaren as ondas...

E se hai tres cousas que @s surfeir@s non poden esquecer son: a táboa, o neopreno e a crema!!! Si, a crema!
Porque metid@s no mar o sol pega que doe!!!
Pero non só no mar, no río tamén.
Non hai que ir tan lonxe para pasalo ben nin para cabalgar ondas, que nunha piragua tamén se pode... e vaia se mola!!!

Ben o saben no club Náutico de Pontecesures, que antonte nos recibiu nas súas instalacións e permitiron a algúns e a algunhas d@s nos@s alumn@s a inesquecible e marabillosa oportunidade de navegar en piragua pola primeira vez.

Lembrando un dos nosos lemas recorrentes, así si que 'Vemos a vila con outra mirada'!!!

Se che gustou a experiencia ou non tiveches a ocasión e queres probar, xa está aberto o prazo para te incribires na Escola de Verán do Náutico.
Velaquí tedes o cartel co que nolo anuncian.

Pero non é o único anuncio que temos nas portas.
O outro avísanos da festa organizada pola ANPA do noso Centro que terá lugar mañá ás cinco.

Mellor pinta non pode ter... non a perdades!!!
E poñede crema!

Festivalga' 25

Hoxe vos traemos noticia da sexta edición do Festivalga, o Festivalga Eurovision'25 -organizado polo CRA de Valga- no que participaron Daniela e Mariña, alumnas do noso centro.
E non só participaron, senón que resultaron premiadas na categoría de parellas, como podemos ver nas seguintes imaxes, que representan as nosas compañeiras posando para a foto co trofeo e o diploma cos que foron premiadas (ademais dun pequeno agasallo).

Se queres gozar coa súa proposta (na que interpretan unha versión do tema 'Loviu', co que Sandra Valero participara en Eurovision Junior), non perdas o vídeo do principio desta entrada.

Canle de WhatsApp do Trasno

Tolo por conseguir que máis persoas consulten os contidos da bitácora, O Trasno Paroleiro argallou unha canle de WhatsApp.
Desa maneira poderás acceder aos contidos da bitácora desde a coñecida aplicación de mensaxería.
Até que a canle non chegue aos 100 seguidores non aparecerá nas buscas directas desde WhatsApp, así que aquí che deixamos a ligazón á canle para que poidas dar a "Seguir": 
https://whatsapp.com/channel/0029VbAgXDRI7BeA34LIHL2U
É tan simple como iso: facer clic na ligazón ou na imaxe superior e logo dar a "Seguir".
Iso si: terás que facelo desde un dispositivo no que teñas instalada a aplicación de WhatsApp (no caso contrario, vai invitarte a instalala). 

E se somos de monte, QUE?

A nosa lingua está inzada de expresións relacionadas co monte.
Non é de estrañar, xa que a masa forestal galega é a máis importante do Estado e non hai no continente moitas que a superen.
"Ser de monte", "estar a monte" e demais son expresións de uso frecuente, en ocasións de xeito despectivo.
"O momento é chegado", o momento da fachenda montesa; se somos de monte, que pasa?, que hai de malo niso?
O alumnado de 5º e 6º do noso Centro elaborou o mural sobre o monte que antecede estas letras co gallo do Día do Medio Ambiente, celebrado o pasado 5 de xuño.
Así, de paso, deunos a oportunidade de rumbar dos nosos montes, que ben bonitos que son!!! 
Pero non lles abondou co monte, senón que tamén fixeron unha interesantísima escolma arredor dalgúns outros tipos de paisaxe.

A invasión dos invertebrados!!!

Como podes ver no vídeo da imaxe superior, a Biblioteca do noso Centro foi invadido por simpáticos invertebrados.
Viñeron do espazo exterior? Fuxiron do Río?
Non!!! Son produto dun traballo feito polo alumnado de 1º de E.S.O. na materia de Bioloxía e Xeoloxía.
A ver quen se atreve a dicir que non molan!!!

Máis un ano, o papagaio e nós!

Como vén sendo habitual nos últimos anos, a Biblioteca do noso centro contou cunha subscripción anual ao xornal Nós diario e á publicación "para xente miúda", como eles din, O Papagaio.
Outr@s teñen que pagar por lelos, ti que podes achégate á Biblioteca e leos de balde!!!

Sementando poesías no Camiño 20.25

Mes de maio

que termina,

mes das flores

que arrecenden,

mes para esquecer, 

mes de sementar

poesías no Camiño.

Do mesmo xeito có ano pasado, @s peregrin@s que repousan no noso veciño Albergue xa poden encher as súas horas de descanso escoitando poemas en lingua galega. Cales? Os presentados á edición deste ano do 'Fai viral a poesía!!!'.
Para iso deixámoslles un cartaz no vestíbulo con acceso aos poemas de Alma, Ana, Yago, Cayetana e Carmen a través de cadanseu código QR.
Ademais, facilitámoslles o acceso a esta bitácora para -tamén mediante o seu código QR- poderen consultar todos os recursos que día a día achegamos.

De Málaga a...

Xa queda moi pouco para xuño –case case nada- e boa parte do alumnado de 4º de E.S.O., acompañado polos profesores David e Miguel, decidiu achegarse a Málaga para ver se chegaba antes.
Como dicía aquela canción “y se fue mirando al sur buscando el verano...”

Nas imaxes podemos velos no bus que os levou do aeroporto de Málaga a Torremolinos, a súa base de operacións, e nas súas visitas ao estadio de La Rosaleda e a Selwo (según a súa web "o parque de animais máis grande de Andalucía").
Tamén gozaron na piscina e de numerosas paradas para a hidratación –utilizando un símil deportivo- que, abofé, deron pé a cantidade de anécdotas que nos contarán á súa volta.

Coida o galego coma unha flor

Falabamos hai uns días que o galego sempre encaixa.
Aló viamos unha palabras formando un crebacabezas pero, se cadra, alguén podía pensar: "E estas  palabras... que significan?"
Pois para resolver esa dúbida o alumnado de Primaria elaborou tamén esta fermosa flor, que nos serve ademais para lembrar que a nosa lingua -como todas as cousas e persoas que aprezamos- require coidados. Por iso o seu lema é "Coida o galego como unha flor".
Do mesmo xeito que O Pequeno Príncipe de Saint-Exupéry sabía que "a miña rosa é importante polo tempo que adiquei a coidala", nós temos que pensar que para conservar a nosa lingua -máis fermosa cá máis fermosa das flores- debemos tamén coidala.
E xa que unha parte moi importante para coidar algo é coñecelo ben, por ese motivo a flor proporciónanos o significado daquelas palabras que compuñan o crebacabezas.

Entrega de premios da XXVII edición do Certame Intercentros

Co gallo do Día das Letras Galegas, as comunidades escolares dos colexios Xesús Ferro Couselo e Baño-Xanza de Valga e dos CPI de Pontecesures e Progreso de Catoira déronse cita no Auditorio Municipal de Valga para entregar os premios da XXVII edición do Certame Intercentros.

Este ano -despois do éxito colleitado pola ANPA do noso centro na organización da cerimonia da anterior edición- a entrega de premios foi organizada pola ANPA do colexio de Cordeiro.

O propósito do acto, como dicimos, foi entregar os premios do concurso literario no que participa cada ano o alumnado de 3º, 4º, 5º e 6º cursos de Educación Primaria dos catro centros do Baixo Ulla e contou con actuacións musicais a cargo das pandeireteiras de Casal de Eirigo e do gaiteiro Pablo Dopazo.

@s alumn@s do noso centro que colleitaron un premio foron:
- Lois Janeiro Castroagudín, gañador do 1º premio na categoría de poesía entre o alumnado de 5º de Primaria co seu poema 'O son das mulleres'.
- Daniela Gándara Jamardo, 2º premio en narrativa de 4º, co seu relato 'As pantasmas Fernando e Pipo'.
- Daniela Campos Quintáns, 3º premio de narrativa do alumnado de 6º, pola súa obra 'O xogo con clave'.
- Abigail Lorenzo Gómez, 4º premio en narrativa de 3º, por 'Na búsqueda do tesouro dourado'.

Se queres coñecer en detalle o nome de todas as persoas galardoadas podes consultar ESTA NOTICIA da web valga.gal.
Para ver máis fotos da cerimonia, aconsellámoste consultares a seguinte publicación no facebook do Concello de Valga facendo clic sobre a seguinte imaxe.