Festivalga' 25

Hoxe vos traemos noticia da sexta edición do Festivalga, o Festivalga Eurovision'25 -organizado polo CRA de Valga- no que participaron Daniela e Mariña, alumnas do noso centro.
E non só participaron, senón que resultaron premiadas na categoría de parellas, como podemos ver nas seguintes imaxes, que representan as nosas compañeiras posando para a foto co trofeo e o diploma cos que foron premiadas (ademais dun pequeno agasallo).

Se queres gozar coa súa proposta (na que interpretan unha versión do tema 'Loviu', co que Sandra Valero participara en Eurovision Junior), non perdas o vídeo do principio desta entrada.

Sementando poesías no Camiño 20.25

Mes de maio

que termina,

mes das flores

que arrecenden,

mes para esquecer, 

mes de sementar

poesías no Camiño.

Do mesmo xeito có ano pasado, @s peregrin@s que repousan no noso veciño Albergue xa poden encher as súas horas de descanso escoitando poemas en lingua galega. Cales? Os presentados á edición deste ano do 'Fai viral a poesía!!!'.
Para iso deixámoslles un cartaz no vestíbulo con acceso aos poemas de Alma, Ana, Yago, Cayetana e Carmen a través de cadanseu código QR.
Ademais, facilitámoslles o acceso a esta bitácora para -tamén mediante o seu código QR- poderen consultar todos os recursos que día a día achegamos.

Entrega de premios da XXVII edición do Certame Intercentros

Co gallo do Día das Letras Galegas, as comunidades escolares dos colexios Xesús Ferro Couselo e Baño-Xanza de Valga e dos CPI de Pontecesures e Progreso de Catoira déronse cita no Auditorio Municipal de Valga para entregar os premios da XXVII edición do Certame Intercentros.

Este ano -despois do éxito colleitado pola ANPA do noso centro na organización da cerimonia da anterior edición- a entrega de premios foi organizada pola ANPA do colexio de Cordeiro.

O propósito do acto, como dicimos, foi entregar os premios do concurso literario no que participa cada ano o alumnado de 3º, 4º, 5º e 6º cursos de Educación Primaria dos catro centros do Baixo Ulla e contou con actuacións musicais a cargo das pandeireteiras de Casal de Eirigo e do gaiteiro Pablo Dopazo.

@s alumn@s do noso centro que colleitaron un premio foron:
- Lois Janeiro Castroagudín, gañador do 1º premio na categoría de poesía entre o alumnado de 5º de Primaria co seu poema 'O son das mulleres'.
- Daniela Gándara Jamardo, 2º premio en narrativa de 4º, co seu relato 'As pantasmas Fernando e Pipo'.
- Daniela Campos Quintáns, 3º premio de narrativa do alumnado de 6º, pola súa obra 'O xogo con clave'.
- Abigail Lorenzo Gómez, 4º premio en narrativa de 3º, por 'Na búsqueda do tesouro dourado'.

Se queres coñecer en detalle o nome de todas as persoas galardoadas podes consultar ESTA NOTICIA da web valga.gal.
Para ver máis fotos da cerimonia, aconsellámoste consultares a seguinte publicación no facebook do Concello de Valga facendo clic sobre a seguinte imaxe.

A festa das Letras

Por fin recuperada a nosa gorxa de tanto canto do sábado, desde as 12:30 celebramos -no día de hoxe- o festival polo Día das Letras Galegas.
Os labores de presentación correron a cargo do alumnado da ESO.
Nunha primeira parte da festa, o alumnado de Primaria interpretou cancións do Cancioneiro Popular de Galicia.

A continuación Lois Janeiro Castroagudín, de 5º, leu o seu fermoso poema 'O son das mulleres', que foi o vencedor no Certame Intercentros deste ano na categoría de poesía.

Pero as rapazas e os rapaces da ESO non ían só presentar, senón que tamén tiveron o seu momento para ler e cantar cantigas.

O alumnado de 5º e 6º de EP puxo a nota deportiva cunha exhibición de acrosport.

Cando xa empezabamos a terminar, fíxose entrega a Enma do seu diploma como gañadora do concurso de Marcapáxinas.
E o concurso 'Fai Viral a Poesía' -non sen tempo- fixo público o nome dos seus gañadores: o Premio do Alumnado, o premio grande, foi para Cayetana e Carmen, que nos deleitaron co poema 'Falade galego' de Eduardo Pondal, con voz e música propias; dos premios do Xurado, o 1º Premio gañouno Yago, o 2º Alma e o 3º Ana.

Coas actuacións musicais do alumnado da ESO -que levaron a toda a rapazada a una conga multitudinaria, contaxiada pola música- púxose punto final ao evento.

Premio Nortear de relato curto, 11ª edición

Está aínda aberto o prazo para participar na 11ª edición do premio de relato curto Nortear que recoñece obras en galego ou portugués.
Este premio está impulsado pola Agrupación Europea de Cooperación Territorial da Eurorrexión Galicia-Norte de Portugal e a Consellería de Cultura, Lingua e Xuventude, en colaboración coa Comisión de Coordinación e Desenvolvemento Rexional do Norte I.P.
A contía do premio non é pouca cousa, nada menos que 3.000 euros.
Poden presentar as súas obras persoas de entre 16 e 36 anos de Galicia ou do norte de Portugal, que teñan unha escrita orixinal e inédita de 5.000 a 8.000 palabras de extensión.
Ademais de recibir a dotación económica, a persoa gañadora tamén verá o seu traballo publicado fisicamente nas linguas galega e portuguesa.
O prazo para presentar orixinais a concurso permanecerá aberto ata o 30 de xuño A TRAVÉS DA WEB DA PLATAFORMA NORTEAR.
Se queres coñecer máis pormenores da convocatoria, podes consultar ESTA NOTA do Portal da Lingua Galega ou estoutra da WEB DA XUNTA.

Sementando poesías no camiño: o cartel

Como podes ver sobre estas liñas xa temos preparado o cartel de Sementando poesías no Camiño para este ano.
En galego, español, portugués, francés e inglés convidamos a@s peregrin@s a desfrutar dos traballos d@s nos@s poetas nos seus últimos pasos polo Camiño Portugués, faltaría máis!
Tamén engadimos a ligazón á nosa bitácora por se @s peregrin@s están interesad@s en coñecer máis polo miúdo as actividades en prol da lingua e da cultura galegas que se desenvolven no noso Centro.
E, á vista está, engadimos a contorna do noso Centro (en concreto o Mirador do Pino Manso) ao tema do noso cartel. 
Moi pronto estará no Albergue para difundir a nosa mensaxe poética...

O mellor amigo do libro, o marcapáxinas

Como sabemos, mañá sábado é o Día das Letras Galegas, neste ano dedicado ás cantareiras e á poesía popular oral.
Xa demos conta en moitas entradas desta bitácora de recursos e materiais a este respeito, e máis virán.
Lembrarás que co gallo do Día das Artes Galegas, celebrado o pasado 1 de abril na honra de Isaac Díaz Pardo, convocamos un concurso de marcapáxinas.
Hoxe temos por fin eses marcapáxinas nas nosas mans e que mellor día que hoxe para repartilos!
Agora que podemos usalos, cada vez que retomemos as nosas lecturas lembraremos a figura do polímata compostelán e deleitarémonos coa composición plástica de Enma Gerpe Fernández, que é a alumna autora da imaxe que figura no seu anverso despois de gañar o concurso.
Parabéns, Enma!

Ollo, que iso non é todo!!! O próximo xoves teremos no centro un festival para celebrar as nosas Letras. Nese festival haberá un oco para que entreguemos os diplomas que temos pendentes. 

Pero se non podes esperar, se o corpo che pide música, mañá tés a oportunidade de satisfacer esa fame, como podes ver na imaxe. Hai que achegarse a Santiago, iso si... peregrin@s dos cantos!!!!

Das Artes ás Letras (e volta)

A semana próxima chega por fin a festa das nosas Letras.
Como sabes, o Trasno está a procurar o mellor marcapáxinas de entre os que presentastes ao concurso para render homenaxe a Isaac Díaz Pardo (a quen neste ano se dedicou o Día das Artes Galegas) e... que mellor día para entregarcho có Día?
O Día, con maiúsculo, o Día das Letras.
Aínda non che podemos dicir cal é o gañador, pero si que esta entre estes doce finalistas:

Cal será o gañador???

Tampouco fixemos aínda público quen gañará 'Fai viral a poesía' nesta edición, non nos esquecemos... achégase o Día!!!

Recursos Olloboi para proxectos audiovisuais

A asociación Olloboi pon ao noso dispor un conxunto de recursos en liña para axudarnos a facer realidade o noso soño, ou facer película a nosa idea, que moitas veces coincide.
A través DESTA LIGAZÓN ou da imaxe superior podes acceder á web do seu festival, NO QUE XA VOS INVITAMOS A PARTICIPAR, e consultar os seus consellos e suxestións.
Non sabemos a que esperades para dar comezo á vosa carreira como cineastas...
Veña a rodar!!!

Déixate de bonecadas!!!

Gústache a carallada? Estás de noraboa!!! 
O CPR Plurilingüe Escravas do Sagrado Corazón de Xesús da Coruña organiza o VIII Concurso de Humor Gráfico "Diego Peña Carro".
Este certame está dirixido a alumnado desde 5º de Primaria ata 4º de ESO.
Iso si: non tes demasiado tempo para darlle voltas aos teus chistes, porque o prazo de entrega dos traballos remata o 5 de maio.
O profesorado enviará os traballos (tiras cómicas) do alumnado participante ao correo electrónico humorgrafico@colegioesclavas.org indicando o nome d@ participante, o curso e o centro escolar.
Se os traballos están feitos en papel, enviarase fotografía de cada un.
As tiras cómicas -totalmente orixinais- presentadas a concurso non poderán ter máis de catro viñetas, estarán escritas en lingua galega e farán referencia ao valor da autoestima.
Se estás interesad@ en participar convén que consultes a convocatoria, que está dispoñible NESTA LIGAZÓN.

Día do Libro, marcapáxinas quero!!!

Como indicabamos nas bases do concurso, hoxe remata o prazo para entregardes os vosos orixinais e serdes @ autor/a do anverso do marcapáxinas co que conmemoramos o Día das Artes Galegas e que vos entregaremos co gallo do Día das Letras Galegas para que lle deades bo uso.
Hoxe, Día do Libro ("cada día ten o seu afán", dicía aquel), é un día tan bo como calquera outro para achegarvos o Calendario do libro e da lectura na seguinte imaxe.
Ben visto, tampouco é unha mala idea para un marcapáxinas...

Estes son os marcapáxinas que nos entregastes: entre eles está o gañador. Podedes ir estudándoos para ver se tedes algún favorito...