Oteri-Ano e Concurso de Podcasts

O Parlamento de Galicia, coa unanimidade de todos os grupos, decidiu declarar o 2026 Ano Oteriano, con motivo de cumprirse o cincuenta aniversario do pasamento desta “figura esencial das letras, o pensamento e identidade galega contemporánea”.
Dase a coincidencia de que tamén en 2026 fai cen anos da publicación de 'Guía de Galicia', unha das súas grandes obras.
O Otero ao que se refire a homenaxe é Don Ramón Otero Pedrayo.
Sobre esta conmemoración deixámosche dúas ligazóns: 
- Á ENTRADA DO PORTAL DA LINGUA GALEGA

- Á NOTICIA DE PRAZA PÚBLICA

E para comezar o ‘Ano Oteriano’, a Asociación de Amigos de Otero Pedrayo acabou de convocar a cuarta edición do ‘Premio de oratoria en formato pódcast Ramón Otero Pedrayo’.
Esta convocatoria está destinada ao alumnado galego de entre 15 e 18 anos.
Para participar podes enviar a túa peza, en formato audio ou vídeo, ao correo da asociación (amigos.de.otero.pedrayo@gmail.com) entre o 10 de febreiro e o 25 de xullo do presente ano 2026.
Este galardón conta coa colaboración da Secretaría Xeral da Lingua e da cooperativa agraria Coren e busca fomentar o coñecemento da figura do escritor e político galeguista entre os máis novos, así como alimentar o cultivo da oratoria.
As propostas gañadoras das tres categorías (que suman unha dotación que rolda os 3.000 euros) serán dadas a coñecer o 31 de agosto.
Os temas preferentes das pezas que se presenten deben ser o medio ambiente, a paisaxe, a sostibilidade, o territorio, o patrimonio, a historia, a xeografía, a etnografía e a comunicación e a tradición orais. 
Do mesmo xeito, deberán estar elaboradas en lingua galega.
Ademais, cada peza contará cunha presentación do autor e do tema, unha mensaxe central e un peche.
Na valoración das pezas terase en conta, de forma preferente, os seguintes criterios: vocabulario, voz e dicción, xesticulación (no seu caso), organización do discurso e argumentación e calidade técnica da peza entregada.
Se queres coñecer máis detalles sobre a convocatoria podes consultalos NESTA NOTICIA de La Voz de Galicia ou facendo clic na imaxe superior.
 

Palabras de Paz

Bo día, querid@ trasn@!
E bo ano!!!
Para comezar da mellor maneira posible o novo ano o Trasno quere recordar o peor do que pasou, pero recordalo para sacar daquela perda o que se poida sacar de bo.
Evidentemente, falamos do pasamento da nosa grandísima compañeira e amiga Paz.
En vez de estendernos en palabras (que sempre serían poucas para contar dela todo o bo que hai que contar) queremos propoñerche a seguinte actividade, asociada tamén á celebración do día da Paz o vindeiro día 30.
Cal é a nosa proposta?
A partir dun deseño no que aparece Paz, escolle unha mensaxe que transmita esa paz que Paz nos facía sentir.
No noso caso, as mellores expresións da paz poden ser a boa convivencia, a solidariedade, a amizade ou o amor que sentimos pol@s que temos próxim@s.
Con esa mensaxe de paz -con esas "Palabras de Paz"- imos completar o deseño e pintalo no mellor entorno que poidamos, para que quede tan bonito como sexa posible.
Cales poden ser esas mensaxes?
Seguro que a ti se che ocorre algunha moito máis acaída pero poderían ser algo así como:
- "Deixa que o amor te guíe"
- "Por que andar enfurruñad@ se podes sorrir?"
- "O riso é o que máis me gusta de ti"
- "Quérote como es"
- "Un bico forte!!!"
- "Nada fai sentir mellor que facer ben aos outros" ...

Ou calquera outra que se che ocorra. Pero claro, unha imaxe vale máis que mil palabras e se cadra non encontramos as palabras que si somos capaces de expresar cun debuxo...
... pois non hai problema; debuxa esa mensaxe se prefires: o que importa é sentir esa paz e harmonía que Paz sempre quixo transmitirnos.
E, cando termines, tes un marcapáxinas que sempre vai servirche de alento.