Debuxos con dereitos

Co gallo da celebración do Día da Infancia, data na que se conmemora a Declaración Universal dos Dereitos do Neno en 1959 e a aprobación da Convención dos Dereitos do Neno en 1989 -como nos contan na web da ONU-, no noso Centro quixemos pór estes dereitos en imaxes.
Unha imaxe vale máis do que mil palabras?
Iso ninguén sabe, pero nunca está de máis.
Agora, moitos deses debuxos nos que o alumnado plasmou os seus dereitos decoran os corredores, compartindo protagonismo coas portas que xa se abren ao Nadal.

Padriños lectores: agora le ti!

Se hai uns días eran @s nos@s amig@s de 1º de Primaria @s que se achegaban para ler contos aos seus compañeiros e ás súas compañeiras de Infantil de 3 anos, agora son @s maiores @s que se achegan á súa aula para lérllelos.  
En concreto, Luis e Sabela, de 1º de E.S.O., foron os contacontos nesta ocasión. 

Está visto que contar contos mola.
Se cadra isto de ser padriños lectores está cheo de vantaxes... podería darse o caso de que aparecese alguén para lerlle contos ao alumnado de 1º de E.S.O.???

Concurso 'Dígocho Eu', cuarta edición

A CRTVG acaba de abrir o prazo de presentación de candidaturas para o Concurso DígochoEu correspondente ao ano académico 2024/2025.
Os centros escolares poden presentar as súas propostas de vídeos escolares antes do 22 de decembro.
As bases completas do concurso están dispoñibles na web da CRTVG NESTA LIGAZÓN.
O profesorado interesado en participar deberá presentar a candidatura enviando un correo electrónico a digochoeu@crtvg.gal
Entre todas as propostas inscritas, farase a selección das 12 cuxo contido sexa máis orixinal, creativo e innovador.
Posteriormente, serán gravadas durante 2025 en cada centro escolar coa participación do alumnado e da presentadora do programa, Esther Estévez, para seren emitidas nas canles da CRTVG.
Unha vez emitidos todos os episodios -en datas próximas ao Día das Letras Galegas-, un xurado de profesionais do audiovisual alleo ao equipo do programa avaliará todas as propostas e outorgará seis premios en dúas categorías (Primaria e Secundaria) de 500, 300 e 200 euros.
Os criterios de valoración serán a calidade lingüística e expresividade dos participantes e a orixinalidade e innovación do contido.
NESTA NOTICIA da web da CRTVG tes máis información sobre o concurso.
Se queres acceder directamente á web do concurso, fai clic NESTA LIGAZÓN ou na imaxe superior.

Abrindo as portas do Nadal

Do mesmo xeito có ano pasado, o Equipo de Biblioteca do noso Centro convoca o Concurso de decoración das portas das aulas co gallo da chegada do Nadal.
Tendo en conta que o tema das propostas do Equipo neste ano xira arredor das artes escénicas, a suxestión é imitar un pano que se abre a cada aula, sempre utilizando materiais aos que se lles poida dar un novo uso.
Na elección das propostas gañadoras valorarán a creatividade, os materiais empregados, a orixinalidade e a partipación maioritaria do alumnado de cada grupo.
O venres 20 de decembro o xurado percorrerá os corredores e dará a coñecer as portas gañadoras.
Os grupos gañadores recibirán un agasallo para compartiren.
O Equipo de Biblioteca, e o de Dinamización con el, anímavos a participar con entusiasmo.

Mochilas viaxeiras: Viaxa lixeir@... pero leva libros!!!

Un ano máis, as mochilas viaxeiras comezaron hai uns días a súa tradicional viaxe. 
Como non podía ser doutro xeito, este ano comezan no grupo de 1º de Primaria, que está demostrando ser o grupo máis lector que alguén podería imaxinar.  

Onde chegarán estas mochilas?
Onde as levarán @s que as portan?
Onde lles levarán os libros das mochilas a elas e a eles?

De momento xa foron pasando por varias mans, e en cada etapa os rapaces e as rapazas que as levan consigo tiran proveito dalgún tipo...

SUXESTIÓNS PARA A PALABRA DO ANO 2024

Xa está en marcha a campaña para elixir a Palabra do Ano 2024, promovida pola Real Academia Galega e a Fundación Barrié a través do Portal das Palabras.
A cidadanía pode enviar as súas propostas ata o 8 de decembro.
A partir desa data seleccionarán as finalistas para unha votación popular que se realizará en liña entre o 11 e o 25 de decembro.
A iniciativa busca salientar vocábulos que reflictan os temas destacados deste ano.
Podes acceder ao Portal para realizar a túa suxestión a través DESTA LIGAZÓN ou facendo clic na imaxe superior.

NON DIGA DECEMBRO, DIGA BELÉN!

 

Chegou por fin decembro e con el, ademais do inverno, abriuse a tempada de beléns.
O primeiro do que vos damos conta -pero non será o único- é o belén artesanal de Valga, que onte abriu as súas portas.
Até o 12 de xaneiro tes a posibilidade de visitalo, como nos contan NESTA NOTICIA de El Correo Gallego.
Podes velo calquera tarde de 17:30 a 20:30, aínda que os sábados e os domingos abre ás 17:00 e os domingos, ademais, pode visitarse de 12:00 a 14:00, totalmente de balde.
Como sabemos, trátase dun dos beléns máis visitados de Galicia e conta co humor e a crítica social como dúas das súas características máis salientables. Noutras palabras, unha especie de entroido adiantado. 
Vai velo xa, porque pronto teremos o de Porto a pleno rendemento!!!
Se queres saber onde está ubicado ou como chegar ata el fai clic na seguinte imaxe: