Agora que temos radio...

... non temos desculpa para non estar atent@s a convocatorias como esta...
Como cal???
Como esta: a Deputación da Coruña convoca a primeira edición do Premio Pódcast Transmitindo en Galego, destinado a impulsar a creación sonora en lingua galega.
Poderiamos pensar que ao tratarse dunha Deputación Provincial @s de fóra da provincia non poderiamos presentarnos, pero non, si podemos.
Podemos sempre que non teñamos "a residencia fiscal nun país ou territorio cualificado regulamentariamente como paraíso fiscal, de conformidade co disposto no artigo 13.f) da Lei 38/2003, do 17 de novembro, xeral de subvencións". Imaxino que non.
Contémplanse catro categorías:
A) O teatro do aire: Obras orixinais de ficción sonora ou que estean baseadas en obras xa existentes ou adaptadas e que usen voces, efectos sonoros, músicas, ambientes, sons, etc.
B) A palabra fiada: Entrevistas, conversas, debates ou diálogos que sexan a base conversacional do contido do pódcast, entre dúas ou máis persoas, sobre calquera temática.
C) A pescuda sonora: Pódcasts divulgativos e creativos que pescuden un asunto concreto, unha persoa, problemática ou acontecemento social.
D) A voz da nosa lingua: Pódcasts que contribúan ao estudo, divulgación, promoción e uso da lingua galega.
Como é lóxico, os galardóns buscan dar visibilidade á lingua galega neste eido e favorecer producións de calidade, diversas e innovadoras.
O prazo de presentación das candidaturas "finalizará ás 14:00 horas do día 18 de decembro de 2026".
Se estás interesad@, CONSULTA AQUÍ AS BASES COMPLETAS DA CONVOCATORIA ou fai clic na imaxe do inicio.

A célula cesureña

Non!!! Que non cunda o pánico!!!
Non falamos dun comando terrorista, non!

Falamos de 'As células animais e vexetais', unha exposición que xa podes visitar na biblioteca do noso centro.
Como podes ver nas imaxes, trátase dunha exposición de maquetas de... a ver como cho digo... células animais e vexetais.
Na realidade son un pouco máis pequenas, pero se se trata de entender algo mellor amplialas, non?
Así que non é so gozar das cores e das formas, tamén podes aprender alguna que outra cousa se te pasas pola biblioteca...

Esta exposición foi elaborada, por certo, polo alumnado de 5º de E.P. do noso Centro.

E, como sempre che dicimos, paga a pena vela en persoa, que as fotos ás veces non saen tan ben como quereriamos...

Todas somos tecedeiras de esperanza!

O pasado xoves, día 15 de outubro, o alumnado de 1º, 2º, 3º e 4º de E.P. achegouse á Biblioteca Municipal de Pontecesures para asistir a dúas dinámicas presentadas por Carballo con Botas.
En “Todas somos árbores”, co alumnado de 1º e 2º, Zapatiños de Cartón (o avó do Carballo con Botas) achegouse á biblioteca cunha carta dos bosques.
Nela, as árbores queren dicir aos nenos que aprendan a coidar a terra escoitando os libros, xa que os libros permítennos saber como coidar os teixos, os freixos, as bidueiras...
Non temos que esquecer que, tempo atrás, os libros tamén foron árbores.

O alumnado de 3º e 4º, pola súa parte, participou en “As tecedeiras de esperanza”.
Como se vai poder tecer esperanza?
Pois tecendo unha árbore para atrapar contos solidarios.
O alumnado aprendeu a coser tenrura, esperanza, igualdade e futuro.
Como culminación plantou "A sobreira tecedeira", unha árbore en contra da violencia de xénero.

Como dicía o outro, unha mañá ben aproveitada.
Ámbalas dúas actividades, que xa non o diciamos, forman parte do programa Ler conta moito, da Rede de Bibliotecas Públicas de Galicia. 

Youtubeiras, atacade!!!

Máis un ano, chegan as youtubeiras, e xa van dez!
Xa que logo, os Premios Youtubeiras+ celebran a súa décima edición.
Fanno cun novo galardón honorífico destinado a recoñecer traxectorias destacadas na creación dixital en lingua galega.
O certame manterá sete categorías cunha dotación total en premios de 7500 euros, e terá aberto o prazo de inscrición ata o 15 de novembro.
Ademais, ofrecerá tres obradoiros gratuítos en liña para reforzar as competencias técnicas, creativas e lingüísticas das persoas creadoras de contidos.
Queres saber máis ou inscribirte?
Pois segue ESTA LIGAZÓN ou preme na imaxe do inicio.

Yayoi na biblio

 

Como podes ler na imaxe, o alumnado de 5º de Educación Infantil do noso centro ten o pracer de convidarte a unha exposición.
Unha exposición do seu traballo inspitado nas obras da artista xaponesa Yayoi Kusama que, por certo, tería sido moi do agrado dela.
Con certeza, teríase amosado sorprendida de que nun lugar tan afastado coma Pontecesures, do outro lado do mundo, a cativada prestase atención ao seu modesto traballo.
Iso si, non te demores, porque a exposición vai permanecer aberta desde o mércores día 21 até o venres día 23 de outubro.
Se queres facer un breve repaso pola longa vida de Yayoi podes facelo a través DESTA LIGAZÓN á web do Museo Guggenheim de Bilbao.
Para ver algunhas das súas obras, espalladas polo mundo, podes facelo AQUÍ.

Magoadamente, Yayoi non poderá visitar a exposición, xa que faleceu hai dous meses, pero saber que esta mostra estaba en marcha habería de ser unha das últimas alegrías da súa vida.

Nós só che podemos traer testemuño da preparación da exposición e unhas imaxes bidimensionais das obras. Velas ao natural é outra cousa...
Non a deixes pasar!!!

O noso magosto

O CEIP Emilia Pardo Bazán de A Coruña non deixa de producir materiais do máis acaído e interesante.
Neste caso falámosche da proposta didáctica O noso Magosto, elaborada por Noelia Antelo Blanco.
Este recurso, en formato Calameo, ao que podes acceder a través DESTA LIGAZÓN, conta con numerosa información e actividades sobre esta festa tradicional: publicacións de interese, a castaña na nosa literatura, pezas musicais ás que podes acceder a través de códigos QR, letras de cantigas populares, ditos, adiviñas, receitas, xogos... 
A ver quen dá máis por menos!!!

Orador(a) Oteriano(a)

 

A Fundación Otero Pedrayo e a Asociación de Amigos de Ramón Otero Pedrayo convocan o Premio de Oratoria «Orador do Ano Oteriano 2026 Ramón Otero Pedrayo».
O certame, enmarcado nas actividades do Ano Oteriano, premiará pezas gravadas en lingua galega e centradas no pensamento, na obra, na figura ou no legado cultural do autor.
En relación aos premios falan de 6.000 euros, non che digo máis.
Iso si, o prazo de presentación dos traballos finaliza o 15 de novembro.
Na WEB DO CONSELLO DA CULTURA GALEGA cóntannos algo máis.
Se o que queres é consultar as bases, pódelo facer desde aquí mesmo NESTA LIGAZÓN.