Comer, rascar e a Maside recordar

Comedeiros naturais para comensais larpeiros

O pasado venres, 29 de maio, o alumnado de 1º de E.P. púxose ecoloxista e botou man daquel vello eslogan: "Pensa global, actúa local".
De que xeito?
Pois utilizando materiais naturais da contorna para elaborar con eles comedeiros para os nosos veciños paxariños.
Estes paxariños, xa ben mantidiños, irán logo de aquí a acolá e mudarán o mundo...

Rasca, rasca!!!

Comer e rascar é todo empezar...
As nenas e os nenos de 1º de E.P. foron rascar arredor da figura de Begoña Caamaño e aprenderon algunha que outra cousa.
Se é que xa o di o nome: Begoña Caamaño... Rascado.

A mirada de Maside

Non nos esquecemos nesta actualización de fin de curso dun traballo desenvolvido polo alumnado de Primaria, que se pon na pel de Carlos Maside para retratar a nosa vila.

Máis que na súa pel, nos seus ollos.

Como podemos ler na imaxe, "Vemos Pontecesures cos ollos de Carlos Maside", no seu centenario, o da vila, que levamos conmemorando durante este ano académico que termina (como che contamos, por exemplo, a semana pasada nesta mesma bitácora).
Os ollos de Maside, cesureño e un dos pintores máis importantes da historia de Galiza.
Ollo!!!

Nós, os papagaios...!!!

Como vén sendo habitual nos últimos anos, a Biblioteca do noso centro contou cunha subscripción anual ao xornal Nós diario e á publicación "para xente miúda", como eles din, O Papagaio.
Outr@s teñen que pagar por lelos, ti que podes achégate á Biblioteca e leos de balde!!!

Vento en popa a toda vela!!!

 

O verán xa está aquí, o climático; o astronómico chegará nunha semana.
Anticipándose a el, o alumnado de 5º e 6º de Primaria achegouse o pasado mércores a Vilagarcía de Arousa para dar os seus primeiros pasos no mundo da vela.
Ou, máis que os seus primeiros pasos, as súas primeiras viradas, que é do que se trata.
Os rumbos e o resto da terminoloxía náutica quedan para as seguintes leccións.
E xa que estamos a falar de vela, traémosche tamén noticias da nosa, da vela tradicional galega, que acabou de celebrar este sábado en Portonovo o comezo dunha nova edición da Copa Mörling.
Bótalle unha ollada a esta noticia do Diario de Arousa que nolo conta, ou a esta de Xornal 21, máis actualizada.

Da imaxinación ao papel, do papel á escea

Antonte mércores o alumnado de 4º de E.P. representou por primeira vez ante o público, no incomparable marco da biblioteca do noso centro, a súa obra "De sempre, traballadoras".
Esta peza nace, como indica na propia representación o presentador, "baseada nun relato gañador do I Certame de relato curto Oria Moreno" que foi "escrito por unha alumna do noso Centro, Clara Sorribas González, que naquel momento cursaba 6º de Primaria"; agora é alumna de 1º de E.S.O.

"Gustounos tanto", continúa o presentador, "que a mestra decidiu facer unha pequena adaptación para que a puidésemos representar".
"Trátase dunha historia protagonizada por unhas mulleres que traballaban como vendedoras de peixe, coñecidas naqueles tempos como Patifas, a mediados do Século XX, anos de posguerra en España, tempos moi difíciles".
"Estas mulleres, ademais de atender as súas casas e á familia, ían desde Pontecesures polas aldeas dos concellos dos arredores co peixe nas cestas ou panelas e en burros. Non sempre traían cartos, tamén esmolas porque a xente das aldeas tampouco tiña, e dábanlles ovos, patacas, grelos..."
Entre parlamento e parlamento houbo tamén momento (rima interna) para cantar e danzar algunha peza tradicional... ou non tanto.
Nas imaxes temos, en todo caso, testemuño do resultado.
E non podía faltar, entre elas, a foto do elenco saudanado e posando coa autora.

これがオンライン翻訳者の目的です

Amig@s da bedé, estades de noraboa!
Bueno, bedé, BD, banda deseñada, cómic, historieta... como queiras chamalo...
Por qué?
Porque acabou de nacer Yisus Editorial.
E que?
Yisus Editorial é un novo selo dedicado a publicar manga en galego, co propósito de conectar a nosa lingua coa cultura pop, internet e as novas xeracións lectoras.
A súa estrea é hoxe, 11 de xuño, con 'Algún día volverémonos ver', da autora chinesa Smalltung.
Trátase dunha obra de xénero yuri ambientada no Hong Kong de 2019.
A editora busca crear un espazo estable para o manga en lingua galega e responder a unha demanda cultural xuvenil que, até agora, apenas contaba con oferta na lingua propia.
Se queres coñecer máis, le ESTA NOTICIA DE CULTURA GALEGA.
Sayonara, baby!!!

Vemos a vila con outra mirada: a exposición

Despois de todo un ano de traballo do alumnado de 1º, 2º e 4º de Primaria por fin temos exposta "Vemos a vila con outra mirada" nos corredores do primeiro andar do edificio de Primaria e Secundaria.
Como sabes, estamos celebrando o centenario do noso Concello e, con el, o tema do proxecto de Biblioteca para este ano foi precisamente o desta exposición do que hoxe che traemos noticia.
As fotos nunca son un reflexo fiel, senón unha interpretación ou testemuño, así que para sacarlle todo o partido non deixes pasar o tempo e bótalle "outra mirada": a túa!!!

Ondas do Ulla... deixádevos navegar!!!

Conta o calendario (e por días o tempo confirma) que o verán chegou.
En parte por iso, pero non só, o pasado xoves o alumnado de 5º e 6º deixou as aulas e baixou ao río para se iniciar no fermoso e divertidísimo mundo do piragüismo.
Das imaxes podemos deducir que moi mal, o que se di moi mal, non o pasaron.
Había @s que xa tiñan calo de tanto navegar, pero tamén @s que debutaron subid@s á seguridade dos -por outro lado pesados- autobaleirables.
Despois do ben que o pasaron esta primeira vez, xa estarán contando as horas... porque o martes 16 volven coller a pá.
E se quedan con gañas de máis, están de noraboa, porque agora que xa saben de que falamos cando falamos de piragüismo poden apuntarse á Escola de Verán e, ¿por que non?, continuar navegando toda a vida.