Regueifesta en Vilalba!!!

Este fin de semana, do 17 ao 19 de xaneiro, a localidade luguesa de Vilalba acollerá o I Campus de Regueifa RegueiNov+s – Regueifesta.
Esta convocatoria está dirixida a mozos e mozas de entre 12 e 16 anos e busca fortalecer a regueifa como ferramenta cultural e lingüística a través de actividades como palestras, obradoiros e demais, que destacan o seu papel na normalización do galego.
Se estás interesad@ en acudir, podes completar a información NESTA LIGAZÓN ou facendo clic na imaxe superior.

Bluesky, en galego, pero o seu uso nas TIC non dá despegado

É posible que non coñezas que Bluesky é unha plataforma de microblogging alternativa a outras máis coñecidas como Threads ou, sobre todo, Twitter (rebautizado como X por Elon Musk, o xastre da nova administración Trump).

Desde hai uns días xa está dispoñible a versión en galego de Bluesky (como antes xa estivera a de Facebook, por exemplo).

Pode parecer unha parvada, pero a presenza da nosa lingua no eido das novas tecnoloxías é un dos piares que pode garantir a súa continuidade, polo que é un motivo para estar ben contentos.
Temos a ferramenta en galego... agora escribamos nós en galego tamén!!!

Porque non o usamos tanto como deberiamos.
De feito, vén de publicarse o estudo realizado polo Observatorio da Sociedade de Información e a Modernización de Galicia (OSIMGA) -adscrito á Axencia para a Modernización Tecnolóxica de Galicia (Amtega) da Xunta de Galicia- a partir dos resultados da Enquisa da Sociedade da Información nos Fogares Galegos 2023.
Os obxectivos da enquisa eran:
- coñecer o nivel de uso da lingua galega nas TIC por parte da poboación galega de 5 e máis anos, incluíndo as principais actividades mediante dispositivos dixitais e en liña,
- analizar o uso do galego nas TIC en función das características sociodemográficas dos individuos e
- avaliar a oferta de recursos galegos nas TIC. 
Se queres acceder aos resultados deste estudo (que, como che digo, non son moi esperanzadores), fai clic na imaxe que está enriba destas liñas ou NESTA LIGAZÓN. 
Se queres estudar o informe completo, telo AQUÍ.

Espazo Proxector

Hoxe achegámoste o Espazo Proxector, que é unha web dedicada a compilar, clasificar e difundir recursos audiovisuais para serviren de apoio á docencia en lingua galega de diversas materias.       

Nel recóllense vídeos sen audio ou con audio ou subtítulos en lingua galega ou portuguesa.         

Orixinalmente o proxecto foi deseñado polo Servizo de Normalización Lingüística da Universidade de Santiago de Compostela. 

Se queres coñecelo máis en profundidade sigue esta ligazón:   

https://consellodacultura.gal/especiais/proxector/acerca-de.php

A través das súas lapelas podes facer a procura das temáticas ou niveis (Ensino), por exemplo, dos recursos que che sexan de maior utilidade.

Tamén podes acceder desde a seguinte imaxe ao filtro avanzado:

Máis de 600 especies de aves... en galego

Como nos conta esta noticia de La Voz de Galicia, a Real Academia Galega pon ao noso dispor unha nova ferramenta en liña que unifica denominacións de máis de 600 especies diferentes de aves.
Desde a web da RAG tes acceso á noticia na que nolo conta a propia Academia.
Esta nova ferramenta permítenos coñecer o nome galego se introducimos o nome científico ou viceversa.
Ademais amósanos as especies que forman parte dunha familia se nós escribimos o nome... ou nin sequera! Porque con introducir as primeiras letras, a ferramenta xa nos suxire as distintas posibilidades, xa sexa de nomes comúns, científicos ou familias.
No caso da maior parte das especies, ademais, ofrécenos unha imaxe para recoñecermos cal é.
E todo isto de balde!!!
Abofé que é unha boa maneira de aprender ornitoloxía.
Se queres acceder a esta ferramenta fai clic NESTA LIGAZÓN ou na imaxe superior. 
A ver cantas recoñeces... eu xa levo seis!!!

VOLUNTARiADO LINGÜíSTiCO

 

Xa está en marcha o programa de voluntariado lingüístico 'Queres falar?' destinado a promover o uso do galego entre a mocidade a través de conversas entre galegofalantes habituais e persoas que queiran mellorar a súas habilidades no idioma ou incoporalo de novo á súa fala.
Esta iniciativa forma parte do plan de medidas elaborado ao abeiro do Pacto pola Lingua que a Xunta está a desenvolver coa implicación de distintas institucións para incentivar a presenza social do galego.
Unha vez que estea aberto o prazo poderás formalizar a túa inscrición como voluntari@ NESTA LIGAZÓN.
Na web do Consello da Cultura Galega fálannos tamén desta iniciativa.

2025, ano Castelao

Como xa sabemos, este 2025 que comeza é o ano das cantareiras (ás que se lles dedica o Día das Letras Galegas) e tamén o ano Díaz Pardo (homenaxeado no Día das Artes Galegas). 
Porén, 2025 é tamén o Ano Castelao, xa que foi o 7 de xaneiro de 1950 cando na diáspora morreu esta figura tan salientable da nosa cultura; xa que logo, acaban de facerse 75 anos do seu pasamento.
Se queres máis información sobre esta celebración tes a seguir:
- ligazón á nota da web de Cultura de Galicia
- ligazón á nota do Consello da Cultura Galega
- ligazón á noticia en Praza Pública
Deixámoste tamén a ligazón a dúas webs con abundantes contidos arredor da vida e da obra do escritor, político e debuxante rianxeiro:
- novo sitio web da Real Academia Galega sobre o Ano Castelao
- web Castelao 2025
En todo caso, seguro que teremos ocasión de darche conta de moitos recursos ou actividades relacionadas con esta conmemoración.

Teatro para rachar estereotipos

Hai xa unhas semanas (foi o ano pasado, en realidade) o alumnado de Educación Infantil acudiu á Biblioteca do Centro para asistir a unha intervención teatral do grupo Koremi.
Nesta actividade, promovida polo Concello de Pontecesures, representaron varios números nos que os actores e as actrices simularon desenvolver diversos oficios.
O propósito, ademais de pasalo moi moi ben, era rachar os estereotipos que aínda hoxe existen arredor de determinadas profesións.
Seguro que @s nos@s compañeir@s máis nov@s, no futuro, desenvolverán os traballos que queiran, e non aqueles que a tradición asocia a homes ou mulleres.