Manuel Rivas, Premio Nacional das Letras

 

Por primeira vez un autor galego gaña o Premio Nacional das Letras Españolas. A concesión deste premio foi publicada antonte, entre castaña e castaña.
Ademais, trátase dun autor galego coñecido pola defensa da lingua galega e polo constante emprego dela na súa produción literaria.
E ese autor é... Manuel Rivas!
De formación xornalista, é autor de moitas obras traducidas a multitude de linguas (entre elas o español) como 'O lapis do carpinteiro', 'Os libros arden mal' ou 'Todo é silencio', por indicar só tres delas, ademais de innumerables artigos, reportaxes, poemas e unha función teatral.
Alén da súa obra e do seu compromiso coa lingua galega, Rivas é coñecido polo seu activismo político durante os últimos anos do século pasado e os que levamos deste.
Algún ou algunha de vós se cadra coñecedes máis a Manolo Rivas por ser pai, pai dun fillo a quen tamén puxo un nome galego...

Se queredes ampliar información sobre este asunto podedes consultar esta noticia de praza.gal, estoutra da web da Real Academia Galega ou facer clic na primeira imaxe e acceder á noticia escrita e televisiva do Zigzag da Galega.

Festa de Samaín na praza de abastos

De festa en festa e tiro porque... porque mañá non hai clase!!!
Avísanos a ANPA de que esta tarde se celebra na praza de abastos a tradicional festa de Samaín, organizada polo Concello (SEGUIR LIGAZÓN) coa colaboración da ANPA e da asociación Valeira.
Na festa haberá chocolate quente para tod@s @s que vos acheguedes e agasallos para os disfraces máis arrepiantes e as cabazas máis terroríficas.
Se desexas participar no concurso de cabazas decoradas deberás achegar o teu traballo á organización entre as 17:30 e as 19:00. Que non se che faga tarde!!!

O San Martiño da castaña

Titulabamos o ano pasado que a toda castaña lle chega o seu San Martiño... pero é que é certo!!!
Como cada ano -nesta ocasión con certo adianto e contra vento e marea (sobre todo contra vento... verdade, Kirk?)- chega o momento de celebrar o magosto: o San Martiño da castaña.

Ben cedo comezaron a facer as brasas e a picar as castañas para que a partir do mediodía a rapazada puidese disfrutar dese ouro pardo que sae dos nosos castiñeiros, abrigado polas súas espiñas. Se é que no fondo a propia castaña é toda unha lección de psicoloxía...

Despois de dar boa conta das castañas, o alumnado puido gozar cos xogos preparados no patio (hoxe o día acompañou, hoxe si) e no pavillón.

Tendo en conta a linguaxe corporal, podemos apostar a que non saíron defraudad@s...

Orgullos@s do noso e d@s nos@s

Achégase novembro e con el dúas festas ben nosas, das que nos sentir fachendos@s: Samaín e o magosto.
Sempre son benvidas, canto máis este ano, coas que tivemos que pasar... quen podería pensar que en só tres semanas ía mudar o aspecto do noso Centro de tal xeito!!!
Moito axudou o traballo do Equipo Directivo e do persoal do Concello para devolver o noso Centro ao estado anterior ao paso do que quedaba do Kirk... agora podemos decir que Está de medo!!!, e sen dúbida o traballo que pasaron merece as nosas maiores louvanzas e recoñecementos.

Estes días, ademais, o profesorado e o alumnado puxeron tamén da súa parte para decorar os corredores de cara ás festas que se achegan, devolvéndolles a alegría que nunca deberon perder.
E, como @ que garda sempre ten, a decoración preparada co gallo do Orgullo engade máis cor, se cabe, ás cabazas e caveiras.
Se cadra non o pensamos o suficiente, pero temos motivos dabondo para estar orgullos@s das nosas tradicións, do noso Centro e, por riba de todo, de todas as persoas que por el, día a día, pasamos e aportamos o pouco que podemos para conseguir a convivencia que moitos e moitas envexan desde fóra.
Así que, a tod@s nós, parabéns!!!

 

Ler conta moito: A loba Antea

O alumnado de 1º e 2º de Primaria baixou esta mañá á Biblioteca Municipal para asistir á actividade titulada 'A loba Antea', que forma parte do programa Ler conta moito.
Según conta a historia, nun bosque que atravesa o Camiño de Santiago vive a loba Antea, unha loba que se encarga de coidar os nosos montes.

 

Porén, ademais diso, Antea é unha loba artista, acróbata e equilibrista!
Ao longo da historia que contaron á rapazada, Antea coñece a Sabela e xuntas aprenden a reutilizar o lixo convertendo o monte que Antea coida con tanto agarimo nun auténtico escenario de circo.
Antea e Sabela chegan mesmo a atopar, grazas á reutilización e a reciclaxe, a solución para salvar o planeta da contaminación.

YOUTUBEIRAS+ 2024

Xa está aberto o prazo para te inscribires nos premios Youtubeiras+ 2024.
Nas seguintes imaxes dámosche a información máis importante.
Se queres máis datos fai click en cada unha das tres imaxes, que serven de ligazón para diferentes partes da web dos premios.
Como ves, a inscrición e/ou as propostas deben formalizarse ANTES do 16 de novembro.
Youtubeiras+ é unha iniciativa de dinamización lingüística organizada polos servizos de normalización lingüística dos concellos de Ames, Carballo, Ferrol, Moaña, Narón, Oleiros, Pontevedra, Santiago de Compostela, Rois e Teo, a Deputación da Coruña e as universidades da Coruña, Santiago de Compostela e Vigo.

Zigzag no Trasno

Desde hoxe o Trasno dache acceso directo (e preferente) ao máis importante espazo televisivo sobre a actualidade cultural galega: Zigzag.
Este espazo, que comezou a emitirse en 2010 como nos conta esta breve historia da CRTVG, emítese a diario na súa versión "Zigzag diario" e os fins de semana como "Zigzag fin de semana"; é certo que os nomes non son do máis ocorrente, pero o programa ten interese dabondo.
Para accederes a el desde o teu computador, unha vez que xa estás na bitácora do Trasno Paroleiro, procura a ligazón aos Zigzag na barra da dereita, como che amosamos na imaxe inferior.
Se queres acceder desde o teu teléfono móbil ou, se cadra tamén, desde algún tablet e non che aparece a bitácora coa barra da dereita á vista, terás que escoller "Ver versión web" abaixo de todo para faceres o mesmo que che indicamos para o caso de visitares a bitácora desde un computador.
Recomendámosche unha vez máis visitar o Zigzag cada certo tempo; todos os días dan conta de novas interesantísimas, que doutro xeito vai ser moi difícil que coñezas.

Ler conta moito: Da árbore ao libro (Cuarto de Inverno)

Na mañá de hoxe o alumnado de 3º de Primaria, acompañado por dúas profesoras, achegouse á Biblioteca Municipal para participar na actividade de contacontos manipulativo titulada 'Da árbore ao libro', que chega ata nós a través de Andrea Jamardo Seijo, antiga alumna do noso Centro.
Como se fai un libro? Que agocha dentro das súas páxinas, ademais dunha historia? Cantas persoas fan falla para facelo? Que clases de libros hai?
Cuarto de Inverno (a editorial que dirixiu a sesión) é parte do nacemento dos libros como un obxecto, pero a  historia do libro é moito máis antiga.
Na dinámica desenvolvida o alumnado puido coñecer os distintos materiais que se pode utilizar para elaborar un libro, soubo dos libros máis raros da historia e acabou a sesión elaborando o seu propio (mini) libro.