Ler conta moito I: 'Historias dun mundo grande'

O xoves pasado, de mañá, o alumnado de 3º e 4º cursos de Primaria achegouse á Biblioteca Municipal de Pontecesures para gozar coa primeira das actividades do programa Ler conta moito programadas para este ano: 'Historias dun mundo grande'.

En 'Historias dun mundo grande' a narradora chámase Becki, que fala a través da voz de Fran Ameixeiras.
Becki ten unha biblioteca, onde pasa tempo e tempo a ler e escribir.
Cóntanos as historias que foi coñecendo nas súas demoradas viaxes polo mundo.
Estas historias serven de desculpa para cantar e bailar celebrando o respecto e a felicidade, xa que todas as historias que Becki nos conta falan da colaboración e da solidariedade entre as persoas.
E que máis...?

Si, ho! Becki é unha cadeliña.
Despois, de volta á clase, o alumnado gozou unha vez máis elaborando as súas propias historias dun mundo grande...

De premio, trinta galicreques!!! E unha tertulia polos 100 anos

 

Chegou 2025, chegou outubro a Compostela e con eles a trixésima edición de Galicreques.
Así que, se gustas dos títeres, estás de sorte!
E se aínda non, aínda máis, porque de seguro vas aprender a gozar con eles.
Se fas clic NESTA LIGAZÓN ou na imaxe superior podes acceder á web do festival, na que podes consultar a programación (SEGUIR LIGAZÓN), os espazos e entradas, o Premio Galicreques deste ano e demais.
Polo tanto, desde o 11 até o 19 de outubro as rúas de Compostela van encherse de bonecos ben simpáticos, xa era hora!
NESTA NOTICIA de Nós Diario cóntannos que, no marco do festival, o público escolar poderá acceder até a 16 funcións distintas.

Pero antes, hoxe mesmo, unha cita que non podes perder.
Na Biblioteca Municipal, ás 20:00, celebrarase unha tertulia arredor da historia do noso concello, que xa ten cen anos e un día...
Toda a información tela no cartel que segue:

Centenario do Concello de Pontecesures

 

O 9 de outubro de 1925 constituíase a primeira corporación municicpal do recén creado Concello de Pontecesures, sendo elexido alcalde José Novo Núñez e sendo a primeira concelleira do noso concello Asunción Calvo. Asemade, formaban parte daquela primeira corporación municipal Luciano García García, Antonio Vázquez Rey, Ricardo Magán, José Fernández Bóveda, José Carrera e José López.
No que vai de ano, o Concello de Pontecesures levou a cabo numerosas actividades centradas na divulgación da nosa historia, costumes e vivencias que acompañaron o desenvolvemento da nosa vila, as cales se prolongarán ata final de ano.
O vindeiro xoves 9 de outubro ás 20:00 horas celebrarase un pleno extraordinario con motivo do noso Centenario, no cal se proxectará o documental no que participaron veciñas e veciños de Pontecesures e no que quixemos recoller as súas historias, a nosa historia dende a perspectiva de quen vive e sinte a nosa vila e ó cal están convidados todas as veciñas e veciños.
Grazas ó traballo da A.C. Xarandeira poderemos coñecer e desfrutar da 'Muiñeira de Cesures', musicada pola agrupación de música tradicional para esta ocasión.
Ó rematar a proxección do documental, poderemos desfrutar dun espectáculo de luces como broche final dun día tan significativo para todas e todos as cesureñas e cesureños.

- - - - - - - - - - - - - - - - - - - - - - - - -

Texto extraído do muro de Facebook do Concello de Pontecesures.

- - - - - - - - - - - - - - - - - - - - - - - - -

Así recolleron algúns medios a celebración:
- La Voz de Galicia
- TVG
- El Correo Gallego 

- TikTok da Galega...

Chiste ou anedota?

Cóntanos o dicionario en liña priberam na súa segunda acepción que en lingua portuguesa unha 'anedota' é unha "pequena narração ou dito que provoca ou pretende provocar o riso".
O seu equivalente galego 'chiste' é tamén correcto en lingua portuguesa.
Na nosa querida lingua de Camões, Pessoa ou Saramago (como na inglesa, na francesa, na alemá, na italiana e a saber en cantas outras máis) un profesor de Física e Química que exerza a súa profesión en Galiza -como podería ser Fernando Calvet nos nosos días- ten todo o dereito, de ser o caso, de impartir a súa docencia.
Pero -aquí comeza a segunda parte do chiste ou 'anedota'- en lingua galega non podería.
E non só os de Física e Química, senón tamén os de Matemáticas, Tecnoloxía e Tecnoloxía e Dixitalización.
O chiste aínda non termina, porque o mesmo organismo que respalda esta discriminación (prohibindo as clases de Física e Química, Matemáticas, Tecnoloxía e Dixitalización e Tecnoloxía en lingua galega -pero non en inglés, etc.-) permítese encher logo o peito celebrando hoxe o Día (ou o Mes, segundo como cadre din unha cousa ou a outra) da Ciencia en Galicia.
En Galicia se cadra, pero non en galego.

O Trasno considérao máis un chiste ca unha anécdota, porque unha anécdota, segundo a definición do dicionario en liña da R.A.G. na súa segunda acepción, é un "feito que carece de relevancia"... e a nós, que nos gusta chamar ás cousas polo seu nome... pois xa ves, a nós parécenos que si que a ten...

Malia todo, se se trata de render homenaxe a Calvet (que el nada fixo para que o resposabilicemos de nada disto) unha boa idea sería ver o filme baseado na súa figura 'Os fillos do sol', dispoñible na web da CRTVG NESTA LIGAZÓN ou facendo clic na seguinte imaxe.

Actividades para este curso no Museo do Pobo Galego

Como vai o día, trasn@?
O Museo do Pobo Galego de Santiago de Compostela acaba de presentar a súa programación (composta por xogos, itinerarios sonoros, visitas teatralizadas...) para este curso 2025-2026, dirixida a todo o alumnado galego, desde infantil até bacharelato.
Esta programación terá como eixe a poesía popular oral durante o primeiro trimestre (lembra que, malia ter pasado o Día, aínda estamos no ano das cantareiras -e de Castelao-).
Durante o segundo trimestre xirará arredor do Entroido -un dos puntos fortes do MPG- e no terceiro terá como tema central o centenario da redención dos foros (se tes curiosidade por saber de que trata o asunto, CONSÚLTAO NO XORNAL LA REGIÓN DE OURENSE).
Para coñeceres a programación completa, SIGUE ESTA LIGAZÓN.
Se prefires situarte antes PODES DAR UNHA VOLTIÑA POLOS ARREDORES.

Está de medo IV

Un ano máis, para celebrar o Samaín, o EDLG convoca o concurso "Está de medo!!!"
Nesta cuarta edición pode participar o alumnado do noso Centro, nas condicións que indican as bases das imaxes que tes a seguir.
Como podes ler nelas, haberá premios para as propostas preferidas do xurado, pero o maior premio é gozar co debuxo e co medo que pases...
Anímate a participar, que (como xa advertimos o ano pasado) non sabes o molesto que é o trasno cando se pon de morros...
Se queres ver algúns exemplos de portadas de libros podes seguir ESTA LIGAZÓN á bitácora Plásticos e Cesureños.

Vai o Gaio metido nun Trasno...

 

Que si, vale,  que xa sabemos que era un gato nun saco, xa, pero a música é a mesma.
A canción sérvenos, en todo caso, para comentarche que (como podes comprobar se consultas a bitácora na súa versión web) desde a columna da dereita podes acceder directamente ao tradutor Gaio.
O ano pasado XA VOS FALAMOS DESTE TRADUTOR.
A novidade é que agora podes acceder a el directamente desde a nosa bitácora, e como sempre de balde.
Seguro que xa sabes escribir perfectamente en lingua galega, pero pode ser unha axuda para outras persoas que están empezando co galego, e por que non llelo imos poñer un chisco máis doado?
Unha cousa si che dicimos: vai máis ou menos ben para as traducións do castelán ao galego e viceversa, pero o do portugués non o teñen moi alá...
E para que non digan que non damos suficientes facilidades, deixámosche dúas ligazóns máis: aos sitios para descargar a aplicación para móbiles do Gaio...

- ... PARA ANDROID
- ... PARA IOS

TikTokeir@s da Galiza!!!

O Concello de Ames organiza a VI edición do certame GaleTikTokers, que anima a crear vídeos en galego para TikTok ou a sección Reels de Instagram.
Poderá participar calquera persoa maior de 13 anos, en dúas categorías por idades, cun máximo de 60 segundos por peza e temática libre.
Repartiranse seis premios de 300 euros (catro decididos polo xurado e dous polo público), cun total de 1800 euros.
O proxecto complétase con xornadas de formación en centros de secundaria. 
O prazo de presentación de candidaturas remata o 30 de outubro.
Para descargar a ficha de participación fai clic NESTA LIGAZÓN.
Se antes queres consultar as bases completas do concurso podes facelo AQUÍ.
Deixámoste tamén a LIGAZÓN Á WEB DO CONCELLO DE AMES, que -como che dixemos- é a entidade que o convoca e a NOTICIA DE EL CORREO GALLEGO que nolo conta.

Atlas Lingüístico Galego, oitava edición

 

O Instituto da Lingua Galega publicou hai poucas datas o oitavo volume do Atlas Lingüístico Galego.
Nesta ocasión céntrase no léxico vinculado ao ser humano, incluíndo 280 mapas sobre 259 conceptos recollidos en 167 localidades galegas.
No cómputo total recolle 3695 variantes léxicas para estes conceptos.
Para cada un dos conceptos ofrécese un mapa coa representación da distribución das variantes léxicas, ademais dunha páxina de notas coa relación das variantes recollidas, os significados asociados á variable estudada e a información complementaria anotada polo persoal investigador (usos das variantes, vixencia das formas ou matices de significado, entre outros). 
Se queres máis información podes consultar ESTA NOTICIA da web da Universidade de Santiago de Compostela.

A importancia de usar o dicionario

Como xa deberías saber, na columna de aí á dereita (se tes activado 'Ver versión web') podes facer a túa procura directa no dicionario da RAG.
Grazas a el, sabemos que se nos falan do "dereito e posibilidade de poder actuar unha persoa segundo os propios criterios e de decidir por ela mesma aquilo que lle atinxe, sen estar sometida ás imposicións doutros"... que bonita definición... pois sabemos que nos falan da LIBERDADE.
O trasno que sabe ler e utiliza o dicionario non entende por que cando falamos dunha "exterminación metódica dun grupo social por motivos étnicos, relixiosos ou políticos" non dicimos sen máis voltas que, visto o dicionario, estamos diante dun XENOCIDIO.
Así que xa sabes, se non queres que che rouben a liberdade, usa o dicionario. 
Na imaxe superior tes unha ligazón a noticias sobre a situación en Palestina de Nós Diario.

Relatos curtos para o Rosal... marchando!!!

O Concello do Rosal convoca a segunda edición do seu Concurso de Relato Curto para fomentar a creatividade e a cultura en lingua galega.
Haberá tres categorías de competición (infantil, xuvenil e poboación adulta) e para escoller as propostas gañadoras o xurado vai valorar que as obras se inspiren na contorna e as tradicións da xente do Concello.
O prazo de presentación de orixinais remata o 9 de novembro.
Se queres máis información podes consultar ESTA NOTICIA da web de Tele Mariñas.
Para consultar as bases completas do concurso fai clic AQUÍ ou na imaxe superior.
Na web do concello tes tamén INFORMACIÓN SOBRE O CONCURSO.
O enderezo electrónico do contacto para resolver calquera dúbida sobre o concurso é o seguinte: informacionxuvenil@orosal.gal
Pois veña, a escribir o teu relato. Se prefires, antes podes DAR UNHA VOLTA POLO ROSAL.

Falas galego? Demóstrao!!!

Para non ter que responder a desafíos coma o do título, ou para responder, pero de vez, existen as certificacións do dominio das linguas.
No noso caso, o da lingua galega, temos os exames Celga.
Hoxe queremos contarte que a Xunta de Galicia abriu o prazo para inscribirse nunha nova convocatoria das probas que permiten obter os certificados oficiais que acreditan o coñecemento da lingua galega.
De tal xeito, após a publicación no Diario Oficial de Galicia, as persoas interesadas en realizar os exames Celga poderán anotarse ata o vindeiro 3 de outubro.
No DOG do 12 de setembro (SIGUE ESTA LIGAZÓN ou preme na imaxe superior para consultalo) tes a información completa.
Se a prefires dixerida por un intermedio, deixámosche tamén a ligazón sobre o asunto do Portal da Lingua Galega... AQUÍ.
Antonte soubemos que a Xunta de Galicia celebrará no mes de novembro os primeiros cen exames en liña das probas Celga do nivel 4 que acreditan o dominio da lingua galega.
O conselleiro de Cultura, Lingua e Xuventude, José López Campos, realizou este anuncio nunha interpelación no Pleno do Parlamento de Galicia. 
Se queres máis información sobre o anuncio podes consultar ESTA ENTRADA do Portal da Lingua Galega.

Axudas do Concello á escolarización

Bo día, querid@ trasn@!

Hoxe traémosche noticias frescas que nos fai chegar a ANPA.

O Concello de Pontecesures publicou as bases para a concesión de bolsas de apoio á escolarización para o curso 2025-2026.

Estas bolsas están destinadas para o alumnado de Infantil, Primaria e ESO; é dicir: para ti.

No caso de Infantil, 1º e 2º de EP as axudas son para libros de texto, material escolar e vestiario cunha contía máxima de 100 euros por alumn@ (por trasn@).

Para o alumnado desde 3º de EP até 4º de ESO as axudas son para material escolar, vestiario e material informático cunha contía máxima de 80 euros por menor.

Estas axudas están condicionados polos requisitos de ingresos familiares.

Se queres máis información podes consultar nos Servizos Sociais do Concello.

Alborota o algoritmo!!!

Un ano máis, chega a convocatoria do concurso Youtubeiras+, e xa van nove!!!
Nesta ocasión, baixo o lema “Alborota o algoritmo” vai repartir un total de 7.500€ en premios dentro de sete categorías.
O certame está organizado por dez concellos galegos, a Deputación da Coruña e as universidades da Coruña, Santiago de Compostela e Vigo.
Desde ESTA LIGAZÓN tés acceso á web do concurso.
O seu obxectivo é fomentar a produción de contidos en galego nas redes sociais, así como visibilizar os diferentes perfís de persoas creadoras na rede.
Poden optar a estes premios as persoas maiores de 16 anos que teñan canles autoproducidas nas redes sociais en activo e accesibles durante o certame, coa maioría das publicacións en galego.
As persoas menores de idade poderán inscribirse coa autorización dunha persoa titora legal.
O prazo de inscrición estará aberto ata o 16 de novembro de 2025.
Se queres consultar as bases completas preme NESTA LIGAZÓN ou na imaxe superior.
Que queres que che diga???
Alborota o algoritmo!!!

Día Internacional das Linguas de Signos

Un titular ben pouco lucido pero significativo a tope.
Efectivamente, hoxe, 23 de setembro, celébrase en todo o planeta o Día Internacional das Linguas de Signos.
"Das Linguas de signos", si, non "da Lingua de signos", porque hai diversidade.
E xa que temos lingua propia se cadra tes a dúbida... existe unha lingua de signos propia de Galicia?
Pois no seguinte vídeo vaiche a resposta:

Se queres coñecer pormenores da celebración, convidámosche a que sigas ESTA LIGAZÓN á web da ONU ou que premas na primeira imaxe desta entrada.
Se queres aprender o alfabeto dactilolóxico podes consultalo NESTA LIGAZÓN.

Se non saen de Cesures...

 ... uns Siniestro, uns Blur ou -polo menos- uns Mecano non será porque non existan as condicións.
O profesorado de Música do noso Centro (é ben sabido) é o soño de calquera moz@ interesad@ por adentrarse na música popular, e de feito algo hai por aí a agromar...
Pero non só iso: como vén sendo tradición a Escola de Música Moderna ábreche un ano máis a posibilidade de profundizares nos teus coñecementos musicais. 
Na imaxe tes clariña toda a información: no 645 935 720 podes reservar a túa praza e converterte na próxima estrela do firmamento musical.
Xa sabes, non deixes pasar a oportunidade!!!

Renace LongaLingua

A Mesa pola Normalización Lingüística e a Fundación Vía Galego recuperaron hai uns meses a revista LongaLingua.
Na súa orixe tratábase dunha publicación periódica impresa que pretendía ofrecer un espazo para a análise e o debate sobre a lingua e a sociedade galegas.
Agora regresa en formato dixital e podcast, baixo a dirección da xornalista Eva Fernández Prieto.
A publicación ofrecerá análises de persoas expertas sobre a situación da lingua galega en diversos ámbitos, acompañadas de videopodcast en plataformas como Spotify e YouTube.
Se queres ampliar a información sobre esta novidade, consulta ESTA NOTA da web do Consello da Cultura Galega.
Se prefires acceder directamente a LongaLingua, fai clic NESTA LIGAZÓN ou na imaxe superior.  

ChatGalPT

Probablemente xa coñeces a aplicación de intelixencia artificial conversacional ChatGPT.
O que se cadra non sabías é que ChatGPT está preparado para manter conversas, interpretar e elaborar textos en lingua galega.
Pode parecer unha parvada, pero é sinal de que a nosa lingua ten importancia e tamén futuro.
Iso si, ten presente que, como indica sempre: "ChatGPT pode trabucarse. Comproba a información importante"; así que non te conformes co que ChatGPT poida suxerirche cando lle encargues unha tarefa!!!
Se queres conversar con el (ou con ela?) fai clic NESTA LIGAZÓN ou na imaxe superior.